家陣啲女歌手要喺主流樂壇立足，通常都要有美貌同埋身材，再加啲性感就容易上位。鄉謠歌手出身嘅LeAnnRimes，近期為咗帶畀歌迷新鮮感，喺新碟《TwistedAngel》裏面除咗玩埋搖滾同電子舞曲之外，收身成功嘅佢重搵咗樂壇大姐大麥當娜（Madonna）嘅御用攝影師EllenVonUnwerth，替佢拍咗一輯性感新造型照，吸引力同我大口羅拉有得fight！
據一啲樂壇二五仔所講，十三歲就入行嘅LeAnn，細細個就俾老竇當搖錢樹，被迫四圍賣唱，搞到冇晒自由，真陰功！LeAnn今年初終於都忍唔住，同身兼經理人嘅老竇打官司，爭取番自主權，結果一償所願，佢亦即時努力操弗，告別以前嘅babyfat形象，搖身成為樂壇索女。
脫胎換骨後嘅LeAnn，今次搵EllenVonUnwerth為佢度咗波希米亞時尚女子、Ago-go舞后同紅磨坊舞孃等幾個老嫩通吃嘅𠝹仔造型，佢重喺《TroubleWithGoodbye》一曲裏面用七國語言講「byebye」㖭！