皇仁書院慶祝百四周年校慶，下月三號在會展大排筵席。唔知係咪有心整蠱，請咗兩位皇仁舊生會永遠名譽會長：霍英東同何鴻燊會一齊主禮。
噚晚一班舊生，包括前大律師公會主席湯家驊、市建局總裁林中麟、嶺大校長陳坤耀、立法會秘書長馮載祥、歌星吳國敬等，齊齊返皇仁書院內嘅舊生會會所聚餐，席間講起不少少年往事。
六八年畢業嘅馮載祥，當年組成皇仁第一隊流行樂隊，自任主音歌手，重計劃過同低佢一屆嘅湯家驊合作，闖蕩樂壇搵食。好彩唔成事，否則今日香江就少咗一位至醒嘅立法會秘書長同一位敢言嘅大律師。可能為咗彌補當年嘅遺憾，所以下個月校慶晚宴時，馮載祥同湯家驊會同師弟吳國敬夾band，獻唱Beatles名曲。
皇仁三度易名，一八六二年時叫中央書院，一八八四年改名為維多利亞書院，至一八九四年先叫皇仁。
（圖）三位皇仁舊生夾band，唔知係歌星吳國敬（中）唱功好啲，定係大律師湯家驊（左）或立法會秘書長馮載祥呢？ 黃冠華攝
傳真︰2623-9278
電郵︰