近排潮流興併股，併完股就股價大跌，小股民輸到渣到冇，幕後就成功收貨，但偏偏有人玩相反，將股份拆細，舊時市旺就通常有後着，但家陣個市咁淡，真係唔知人哋想開邊瓣？
經紀陳噚日同小初講起隻環球飲食（970），佢話漫畫大王早排先至成功完成收購，噚日通過改名做玉皇朝飲食，並將股份由1股拆細做5股。舊時市旺，股份拆細，唔使問阿貴都係想炒，但家陣就真係好難知佢炒唔炒得成。
聽聞漫畫大王本來想將自己檔生意搞上創業板，點知差少少唔成事，家陣買隻主板殼，雖然貴就貴多少，但點都好過要喺創業板掛牌。雖然環球飲食𠵱家係賣緊壽司，但據聞漫畫大王有意發展其他業務，當然係離唔開娛樂事業一類。
早排漫畫大王為咗維持公眾持股，以每股1.29元，配售1100萬股或15.4%股份出街，之後環球飲食股價就mark上，噚日收1.45元。聽聞接貨者正諗計走人，但個市咁差，好難搵人接貨。
慕容小初