香港汽車代理商一般引入嘅車款，大多以普羅車迷接受程度為着眼點，鮮有注意到傷健人士嘅需要。然而，日本各大車廠均有響旗下嘅車系當中，設有所謂福祉車輛嘅型號，以方便有傷健成員嘅家庭使用。最近，就有獨立車行為要引起業界同市民嘅關注，更聯同公益金推廣豐田最新AlphardWelcab特別版，以愛心之名宣揚訊息呢！
記者、攝影：陳偉林
新車售價：$459,000
車輛提供；富利堡汽車（23330747）
外觀上，呢部豐田AlphardWelcab特別版，跟一般大型MPV無異，既有方便上落嘅雙趟門組合，又有前後泊車感應器裝置；然而，響中排左邊嘅位置上，卻加有最新電動輪椅設計，只要按動遙控器，輪椅便可自由上落，大可不假人手之餘，輪椅重可以獨立使用，唔需要傷健人士要轉座椅嘅麻煩。
查實呢部Alphard嘅車廂配搭，同屬三排七座位組合，僅中排靠左座席，設計成活動輪椅裝置；座椅之間既有Walk-through嘅方便外，後排亦可以收摺起，以騰出更大容量嘅尾廂空間。除電窗、電鏡及雙天窗組合外，重備有高級音響同前後獨立恒溫冷氣，當然唔少得重有雙安全氣袋組合啦！然而，新車沿用一台3.0公升V6偈，匹配4前速自動波箱，還予人有駕駛容易、操控安全嘅體驗㗎！
早前，曾有個別汽車代理商，有意引入大型傷健的士抵港，車內除置有電動升降台，以方便輪椅乘客上落之外，車廂內重置有商務設施。
而呢款豐田AlphardWelcab特別版，另外可選配尾廂設有升降台嘅版本，大可停泊兩部輪椅咁多㗎！