號稱樓神的電盈基建業務主席李智康除咗賣樓叻，原來亦係食家。噚日佢請班記者去信和個南灣半島間「董家掌門人」食大閘蟹飲水鴨湯，睇嚟數碼港日後應該有啖好食。
李智康最近去法國幫數碼港買家具，不過，佢昨日始終唔肯講買咗乜嘢，只係話明年初售樓處開幕時大家睇示範單位就知。據佢講，數碼港嘅單位除咗個個單位有露台、全海景外，住客會所更屬前所未有；有豪宅級數，但收費就大眾化，總之係女嘅去到「心花怒放」、男嘅就「樂而忘返」，直情「上有天堂，下有數碼港」咁話。
樓神賣過咁多樓，邊個最難忘？佢話係沙田豪宅寶松苑。當日佢同記者一齊坐車去樓盤開記者會，點知遇着港股大冧市，一程車時間，港股已冇咗二千點；落車時公關問佢係咪繼續開記者會？佢答話當然開啦，股市跌咗啲錢自然流入樓市！結果一號屋萬八蚊一呎，其他就萬二至萬三蚊。又得咗。
講到私人投資，原來李智康一直只買樓，冇買過股票，𠵱家擁有的電盈股票亦係老婆嘅。佢話買樓投資收租，回報率比較理想，壞消息亦出得七七八八，且愈來愈「細」，由雞（禽流感）變咗做蚊滋（登革熱），所以好樂觀，重話自己亦會喺數碼港置番個單位。果然係賣花讚花香。
傳真︰2623-9278
電郵︰