幾個禮拜前停架車喺會展中心舊翼停車場，交錢攞車之際，一位靚女站在繳費窗口旁，力邀左丁山到B2地庫嘅舊車展覽場參觀，話明行一行就可以蓋印，慳番兩個鐘頭（還是一個鐘頭，唔記得矣，當時暈暈哋）嘅停車場費，為咗知慳識儉，就由靚女帶領，落去睇吓，嘩真係好多車噃，一架「波子」翻新，靚到暈，價錢唔貴，幾乎想立即試車。
不過英文有句俚語，就係「二手車推銷員」，左丁山成日都記住，唔敢自己去買「中古車」、「二手車」、「舊車」，除非有信得過嘅熟人介紹啦。會展中心B2嘅二手車展覽場其實十分方便，但都係唔敢輕易落叠，皆因以前不時有二手車行唔老實嘅傳聞所致。
呢日睇電腦周刊，見到一間公司廣告，賣筆記電腦「砌機」，價錢吸引，記憶體爆棚，好抵買啫，於是找電腦J一問，佢話：「你自己都唔識砌機，砌部渣嘢畀你都唔識分別，不如買番一部名牌好過。」呢，呢樣又係信心問題，我哋唔係行家，對啲二手貨、深水埗砌機，真係唔買得落手，明知貴啲，都係要買名牌，例如Sony就特別貴啲，主要就係靠名氣。
香港一啲行業其實甚有生意頭腦，亦識包裝（如砌機、會展車場），只可惜品牌信心尚未建立。英文諺語有一句：Honestyisthebestpolicy，商場人物應奉之如神明。