本來今日對香港體壇嚟講，實在是好消息一個接一個，下午先有李麗珊穩奪金牌，晚上又有黃金寶奪銀牌，不過因為大會記分問題，令「阿寶」一場歡喜一場空，實在戥「阿寶」唔抵。
小記連日來採訪單車比賽，發覺大會統籌完全唔掂，好似「阿寶」嘅強項二百公里公路賽，大會無端端改短到一百六十九公里，又將比賽時間由十月二號改到三號，重喺幾日之前先通知港隊新比賽日子，就咁打亂晒「阿寶」嘅部署。
今次比賽又係，原本係四十公里記分賽，又唔知點解前幾日又改成三十公里；重要犯埋啲記分出錯咁無謂嘅人為錯誤，真係天大笑話。最慘係「阿寶」，無端端成受害者，燦爛笑容隨即變成尷尬嘅苦笑，真係難怪沈金康咁勞氣。
不過香港運動員一向有永不言敗嘅鬥心，小記希望「阿寶」同拍檔何兆麟係麥迪遜場地賽爭氣，攞番面獎牌補數啦。