港股噚日終於跌破4年低位，低見8844，恒指收報8931，跌119點，成交52億元。
地鐵（066）一度跌破8.88元好意頭招股價，電盈（008）更跌破1元，收0.99元，成為毫子股。噚日咁多股票破底，可算係散戶悲哀的一日。不過唔知今次係悲哀嘅開始，抑或係最後一次陣痛？近期市場焦點將落在布殊全國演說上，以及也門油輪爆炸意外會否一單接一單發生，大市短期內要反彈相當困難，一旦美伊戰事爆發，油價上升，息口可能會扯高，若香港息口跟住上升，聯滙可能隨時出事。
華燊燃氣（8035）噚日突然狂跌23.8%，收0.80元。尾市跌勢尤急，據聞話有基金要洗民企倉。不過，以噚日成交額只得878萬元嚟睇，又唔多似係洗倉。
地鐵噚日最後以8.90元收市，保住散戶招股價，其實主要靠中銀證券尾段力托，不過仍見唔少大行如瑞銀華寶等力沽，所以後市不樂觀。政府成日話要配售第二批地鐵股份，但以現時市況看來，根本難以進行，就算政府肯明益地鐵，以大折讓價將九鐵注入地鐵，亦未必吸引到投資者興趣，因為市場相當缺乏游資。
雖然市場缺乏游資，但中國電信似乎仍會夾硬上市抽水，所以持有中國移動（941）及中國聯通（762）嘅投資者，呢回真係有得震無得瞓，和黃（013）亦可能成為拋售對象。
電盈1元關口失守，主要因為有傳聞會被踢出恒指成份股之列。不過黑客話，電盈市值排在20位，點輪都未輪到佢出局，恒指服務公司有大把地產股可以踢走，讓位予中銀香港（2388）。
阿虎