日本萬事得車廠，繼於較早前推出全新Mazda2（即日版Demio）後，喺最近舉行嘅法國巴黎車展上，又展出咗一款走高性能房跑車路線嘅Mazda6MPSConcept概念車，當中一台馬力輸出達280匹嘅2.3公升Turbo偈，以及跑味十足嘅車廂布局，更係賣點所在呢！
全新Mazda6MPSConcept概念車，造型可謂極具「挑釁性」，事關佢除咗裝有全車包圍、頭尾擾流器及氣霸，望落與同廠RX8相似外，另外重有四輪18吋跑車合金胎軨、全新頭尾燈組合、設計獨特嘅門邊鏡、尾定翼及拋沙板設計等等，全都將其高性能跑車形象展示出來。
然而，廠方為其裝上一台MZR新2.3公升燃油直接噴注Turbo引擎，馬力280ps/6500rpm，扭力則為36.7kgm/3500rpm，無論起步加速都可有敏捷嘅反應。經強化嘅懸掛組合，加上多套電子系統，以及一套245/40ZR18輪胎組合等等嘅輔助下，循迹性之高亦予人有莫大信心。
車廂布局與造型設計相同，一樣以跑車形象掛帥；雖然表板同中控台與現有Mazda6相近，但當細心留意下，就會發覺車內座椅全以以雙色配襯，望落夠晒突出吸引之餘，一雙前排更屬桶形設計，乘坐貼服又舒適。三幅式跑車軚環，同埋全新藍底表板配搭，亦有一定吸引力㗎。