西班牙聯賽不嬲球星多、入球多，而啱啱踢完嗰輪西甲聯，精采刺激同戲劇性兼而有之，愈「嗒」愈有味。最難得係味道唔止一種，球迷想歎咩就有咩，唔怪得人人都話，有球王級人馬朗拿度及施丹嘅西班牙波係歐洲一哥啦。
咁多場波，最「苦」一定係睇貝迪斯對西維爾，見佢有幾個球員踢到抽晒筋，真係幾慘。不過佢哋敵我不分幫對方拉筋，又多添份人情味。馬體會作客馬拉加場波有三件俾球證趕出場，夠「辣」，過癮在佢哋得番八件反而先識破蛋。
皇馬球王朗拿度一出場就省入兩粒，唔使講佢啲Fans實「甜」到笑嘞。咦，好似差種「酸」味喎，最「酸」梗係西班牙開波時間唔配合香港，我哋睇直播場次太少囉。
前克羅地亞國腳波班唔單止好波，人緣更好到無人有，佢場響禮拜一晚踢嘅告別賽，請到成棚昔日巨星落場，連巴西嘅李安納度都老遠由巴西飛去薩格勒布；老友巴治奧去唔到都透過個人網站同波班講句唔好意思。各有前因莫羨人，如果你想第日退休嗰陣都有咁多老友肯出嚟聚首，平時要對人好啲啦。
唔講唔知，好多間英超球會一直都利用高科技昅實班球員。佢哋利用攝錄機拍低比賽，之後用電腦軟件做分析。經分析後，原來李鐵係全愛華頓最跑得之人，對維拉一仗嘅跑步距離達一萬二千米。雖然我求大俠覺得跑得多唔代表咩，但至少係一個「第一」呀！
好耐無提到嘅神奇教練米路天奴域最近返咗中國旅遊，噚日就去到瀋陽重溫舊年帶中國隊躋身世界盃嘅舊夢，盛傳金德隊想乘機邀請佢做教練，重講到懶有把握㖭。又係時候講我求大俠嘅口頭禪：流定堅呀？記得金德隊舊年話請到阿仙奴嘅韋拉加盟，成為球壇笑柄，希望佢哋今次唔會再自討沒趣啦。
成日話瘦田無人耕、耕開有人爭。前排76人教頭布朗開到聲想教夢幻六隊，點知噚日「小鳥」布特又大大聲話自己好有興趣，重話真係揸FIT嘅話會「高興並且精心去預備」㖭。梗係啦，上次班美國佬輸得咁醜樣，今次十成十強陣出擊，以美國嘅「卡士」，奧運金牌實冇走雞啦。做教頭嗰個真係蹺埋雙手就攞金牌走，畀我求大俠都仆到去做啦！