牛棚開辦「廿三條補習班」，補習班不一定給報名的你九個A的回報。因為廿三條不是高考，十個史sir對住廿三條，隨時罰企，最後得個U，揩正廿三條的嘢。
補習廿三條是必須的。別以為自己好醒，叻極也不可能叻得過保安局長。精精地，好好思考，一有機會，就考吓保安科。既然明扮代表，你應當事前做足功課，知道熱門的Q&A：
廿三條，是邊廿三條？
犯廿三分之一條，是不是判廿三分之一的監禁年期？終身監禁成條數除以23，等於幾？
為甚麼叫做廿三？跟風水佈局有乜關係？是不是特別旺七十一的董特首？衰廿三入冊，要否連續通廿三次櫃？
繼「一六七」篤數事件後，保安局長又再撻陣，笑淫淫推介廿三條，跟性教育促進委員會有冇從屬關係？
冇預謝霆鋒，有實力頂廿三條包的城中名人，斷估有幾位？
葉劉二十三，一手監製基本法廿三條，跟跳樓自殺的日本導演伊丹十三，有冇交換情報？
廿三條，不是油條，更不是甘油條，所以你不會鼓勵市民三急時使用。但有人偏偏喜歡濫插，只能體諒，這些人有鋪搗小菊花的蛋、攪屎棍的癮！