前晚半夜，亞Mark約咗三五知己，落銅鑼灣酒吧觀賞英超聯賽事，因飯局盡興而遲到嘅亞Mark，揸車途經新會道時竟遇上封路；眺望下竟發現響賓利汽車嘅陳列室外，橫列有一個貨櫃，兩旁重有20人忙得團團轉呢！喺好奇心驅使下，亞Mark泊低部車埋去一睇，原來班人推緊入Showroom嘅車輛，正係剛啱響巴黎首展，英國賓利全新嘅ContinentalGT跑車呀！
及後，據亞Mark打聽所知，話呢部造型咁優美又線條流暢嘅SuperCar，會響香港作亞洲首展嘅第一站，逗留短時間直至周三而已，跟住又會飛去其他國家作巡迴展出，可見得車廠同代理商，對香港市場同車迷係幾咁重視呢！據知，新車用上一台發展自德國福士嘅6.0公升W12引擎，並輔以TwinTurbo配搭，馬力高達550匹之餘，佢重用上源自Formula1賽車嘅6前速半自動波箱及恒式四驅系統，另外0至100公里嘅加速度約為4.8秒而已，而定價則約在港幣200萬上落。亞Mark聽聞經已有唔少車迷，向代理查詢呢部ContinentalGT嘅詳情，由於產量有限嘅關係，明年下半年正式抵港嘅新車配額亦極有限，若然你想擁有呢部賓利新一代SuperCar的話，咁就好趁住今明兩日，行快步去Showroom睇吓同落Order喇！