市場一直盛傳，政府將於短期內推出穩定樓市措施，其中一項係放寬投資移民政策，包括內地人來港置業投資可獲居港權。蘭西昨日收到風，話政府的確正構思以「居港權」吸引內地人士來港置業，而且初步傾緊名額係五萬個。現時每日內地人來港名額為百五個，一年約五萬四個，與投資移民名額相若。
其實呢個建議最大難關係要中央首肯。傳聞就指，由於現時中銀香港承造咗好多樓宇按揭，若然樓市冧，中銀可謂首當其衝，所以中央肯開綠燈。
至於五萬個名額呢個數字是否政府「放風」，想睇吓市場點反應，暫時就未能查證。但蘭西相信政府可能先拋一個大數目出嚟講價，到時可能冇咁多都未定。不過，積壓嘅存貨𠵱家才不過兩萬多個，一年供應量最多三萬個，若一次過畀五萬名額出嚟，住宅豈非供不應求，到時香港人要同佢哋爭？
另外，早排有傳聞，內地人透過來港置業取居港權，物業市值須多於三百萬元，蘭西唔知到時肯攞三百萬嚟買樓嘅內地人，有冇五萬個呢？
地產代理行祥益地產同世紀21奇豐早前向一手樓嘅反擊戰，祥益率先報捷，而世紀21奇豐李峻銘對蘭西講，佢哋都做成三單馬鞍山居屋買賣，成績都算唔錯。
李峻銘講，三宗成交中，富寶花園691呎單位，成交價一百四十萬，業主送佣金、釐印費同裝修費，夾埋都差唔多十萬㗎。而錦英苑515呎單位，就以八十五萬賣咗，業主亦包佣金同釐印費。不過，錦安苑709呎單位，因為價錢平，所以冇嘢送，成交價112萬。三個成交都比市價低3至5%。
李峻銘話，好多買家都唔知，原來買二手樓啲條件可以好有彈性，經過佢哋教育過先知。好似富寶花園嘅換樓買家，手上單位重未賣出，手頭資金唔夠，但因業主肯畀優惠條件，結果以九成按揭入市，有時間執靚自己間屋至賣，唔使擔心兩頭唔到岸。
好多人都試過租樓，但相信都唔會一家大細夜晚踩上門去同業主傾。不過，結果係皆大歡喜收場。
據促成交易嘅香港置業西貢分行經理陳立鴻話，呢位外籍租客因為個仔有同學住喺銀線灣惟馨小築，覺得幾正，所以見有放盤就一於唔放過，闔家去完外地落機，就即刻去搵業主，由於大家都係做生意嘅，所以見面時就大談生意經，又講吓日常生活事，搞到深夜先至開始傾租約，結果唔使半粒鐘就達成協議，業主重主動減到租客嘅心目中價三萬二蚊。
單位面積二千呎，四房兩廳連工人房，另有千呎花園連私家泳池、車房同豪華裝修。
新地周國賢禮拜日先講完，會喺兩周內落實將軍澳中心開售詳情，但今日就已經有搞作，招待傳媒參觀現樓示範單位。唔知係咪因為新地恃住出品質素同口碑好，等買家睇到現樓後，加強入市信心，出貨都容易啲呢？
今日周生都會到場，對於傳媒最關心嘅問題，唔知佢肯唔肯講呢？
中原入主利嘉閣後，人事又有新調動。利嘉閣管理層新增一名猛將，統領港九新界各區成九百多名經理同前線代理。這名猛將係前中原港島區高級營業董事廖偉強（圖三），將出任利嘉閣地產董事一職。以後負責協助董事總經理何紹章，做管理層事務之餘，重管理各區前線營業事務。
利記轄下三區各有主管，新界區係陳大偉，港島區有張偉文，九龍區就有林家樂。有新帥統領，架構就更清晰。
聽講Willy（廖之洋名）喺地產行已有十六年經驗，戰績不少。利記今番有新血加入，除有效加強管理層運作外，重有效提高前線營業部門資源調配同盈利能力。
時裝店老闆每季都會嚟一次大減價清貨尾，估唔到𠵱家連地產商都借用呢條橋。蘭西最近喺報紙見到有發展商登廣告，以「大減價」做招徠，清售貨尾。蘭西心諗，地產商最多都係減些少，斷估唔會好似時裝店咁，一折兩折清貨啩？若果咁做就真係大新聞嘞。
蘭西
電郵地址：