中國星嘅賀歲片初時話由馬偉豪執導，演員有劉青雲、古天樂、梁詠琪（GiGi）同張栢芝，後來又話飛咗GiGi，得番栢芝擔正。不過，𠵱家就話連中國星愛將栢芝都冇埋，變咗由鄭秀文主演，導演都變咗係杜琪峰。
古仔同張栢芝啱啱先拍完《我家有一隻河東獅》，之前又拍過一部《絕世好B》，如果賀歲片又係佢兩個做，又的確冇乜新鮮感，所以古仔拍Sammi新鮮感點都會大啲。而賀歲片由杜琪峰掌舵，馮仁昭覺得會比較穩陣，不過好似中國星都諗過馬楚成，但始終有反對聲音。
至於，另一間電影公司嘉禾究竟今年拍唔拍得成賀歲片？卡士究竟係咪傳聞中嘅楊千嬅同任賢齊？嘉禾發言人杜惠東噚日話：「𠵱家搵有賣埠價嘅演員真係唔易，其實劉德華同梁朝偉都係大卡士，但唔係每間公司都請得起，所以我都幾佩服林建岳咁有魄力。」
竹升仔舊年簽約畀一間電影公司，本來佢外形唔錯，扮奸角又幾出色。不過，佢間公司偏偏鍾意用外援，結果佢就俾公司投閒置散。竹升仔坐咗成年都冇戲開，情況都咪話唔慘，好彩早排佢識咗個圈外女友，個女仔對佢幾好嘅，總算令竹升仔有啲心靈慰藉。早兩個禮拜，竹升仔重同女友拖住手喺銅鑼灣行街，兩個人表現好恩愛，馮仁昭聽聞個女仔好肯同竹升仔捱，竹升仔就真係要對人好啲啦！
羅嘉良噚日接受港台《娛樂滿天星》訪問，問到佢同宣萱會唔會因緋聞而避開唔見對方，佢就話：「我同宣萱依然係好朋友，唔會去避啲乜嘢，我哋之後都重有一齊食飯，不過係喺電視城。」提到𠵱家佢嘅婚姻狀況，佢話：「之前都講過，都知我𠵱家情況係點，盡力啦！」
有傳蔡少芬拍完電視劇《洛神》之後，就唔想再同暗戀佢嘅馬仔馬浚偉合作，於是無綫搵咗個同馬仔從未合作過嘅張可頤一齊拍新劇《金牌冰人》。
噚日幾個主角張可頤、馬浚偉同蓋鳴暉等喺電視城試造型，張可頤一聽到馬仔是非多，就第一時間話自己有金剛罩，重係百毒不侵嗰隻，張可頤話：「咪即管睇吓有乜電眼、緋聞，到時再話畀大家聽！」
張鎧潼（Samantha）噚日喺灣仔為爽健秋冬皮鞋系列拍攝全新一輯廣告硬照，Samantha雖然擁有一雙長腿，但原來佢一直嫌自己胸部太細，佢話：「我上圍都有33吋，體重94磅，上圍畀我大多兩吋就好啦！女仔係比較貪心啲，所以我𠵱家都有食豐胸丸。」
其實以Samantha嘅身形嚟講，三十三吋胸都算啱啱好。