有幾壞？
Robbie當眾搞嘢益街坊

出晒名係壞孩子嘅英國當紅男歌手RobbieWilliams，早幾日返祖家搞掂份新唱片合約，正式成為全英最高身價嘅歌手。可能Robbie呢排心情靚，所以即使早幾日佢喺屋企門口遇到記者都冇扯火，重專登同一個女人喺門口做埋晒啲挑逗動作，實行益吓班狗仔隊，不過啲街坊行過，見到佢哋就眼冤。
我大口羅拉不嬲都知Robbie無女不歡，佢同妮歌潔曼（NicoleKidman）以及RachelHunter嘅緋聞大家都聽唔少，所以今次同呢個新歡梳乎一啲都唔出奇，奇就奇在Robbie今勻冇乜眼光，咁平庸嘅貨色佢都啱！估唔到Robbie𠵱家已經淪落到見到個胸就撲埋去嘅地步！

Rachel食回頭草
不過佢搞完呢個新歡之後，盛傳已經同佢分咗手嘅Rachel第二日又喺佢屋企出現，唔知呢位三十三歲模特兒係咪寂寞難耐要搵佢慰藉呢？
講開又講，Robbie啱啱同佢合作多年嘅作曲人GuyChambers決裂，我就覺得對佢以後開拓美國市場肯定有負面影響。