好多人都知道8894係乜傢伙，就係去年911後最低恒指。恒指昨日最低8844，破8894低位，最後以8931埋單，跌119點，算係暫時「見底不破」。
「見底不破」之後又如何？外圍股市唔掂，港股相對上跌幅唔算大，遲早破底，繼續尋底。暫時如果借住港府托樓市升番啲，又可吼位揸恒指Put輪。理想嘅做法，係等恒指升番上9字頭，買恒指Put輪，對象係9444同9448。
聽講政府今日會講吓撐樓市嘅板斧，新地（016）因此有啲睇頭，昨收46.10元，升40仙，不過其他3隻大地產股長實（001）、恒地（012）同新世界（017），隻隻向下移動。
政府托樓市，真係會令樓市起死回生？新地如果因為咁嘅消息上升，想搵錢嘅可以趁機揸些少新地Put輪，對象係9443。
9443明年1月到期，現價1.32元，溢價5%，槓桿率3.5倍。
長實近排散得好勁，唔覺唔覺，李主席4個禮拜前增持，冇咗9元，有機會因超賣彈番些少，吼住反彈時，趁啲Put輪跌低時買貨，對象係9542。
隻輪明年3月到期，現價79仙，溢價8.8%，槓桿率5.9倍。
章盛