今屆法國巴黎車展，可算係高性能跑車嘅世界，除賓利全新ContinentalGT跑車同新版奧迪S4系列備受矚目之餘，富士車廠亦於會場內展出新版Impreza車系，並獲得不少車迷嘅掌聲；雖然所展出嘅型號屬歐洲版規格，但仍具有一份跑車辛辣味，不如今日一齊嚟先睹為快，睇睇新車有何改變啦。
呢款屬Facelifted型號嘅新版ImprezaWRX，外觀上有頗大改動，無論頭冚、頭燈、尾燈、車頭泵把、氣霸及擾流器等等都用上全新設計，望落更富霸氣之餘，頂級STi跑版更配有大口徑跑車合金胎軨及巨型尾定翼，令人一望而知其身份。至於旅行車版亦作出相應改動，車尾更設有高置尾定翼，以增強高速行車時嘅下壓力，令行車更穩定㖭。
由於屬歐洲版規格，故馬力輸出會與日本版略有出入，當中WRX型號會由原來218匹增至225匹，而頂級STi跑版嘅馬力輸出，則約為265匹；同時，懸掛結構亦經過廠方強化，加上來得更靈敏嘅轉向系統，亦能帶來有更出色嘅操控表現。
車廂布局方面則沒有多大改動，依舊保留有濃厚跑車氣息，當然唔少得有承托力甚豐嘅座椅，以及齊全嘅車廂設備啦；但STi版本就改換上全新三幅式Momo跑車軚環，把持感十足之餘，響前排一雙跑車桶座襯托下，可謂吸引力十足。