眾所周知微軟嘅XBOX將在十一月尾正式登陸香港，為對撼PS2及GAMECUBE之優勢，以及嚟早咗一年嘅水貨打擊，港版XBOX在市場推廣上確要花費不少工夫。微軟亦針對香港及亞洲地區推行多種策略，包括主機中文化、軟硬件減價及跟美日同步推出新Game等，大有「動作多多，誓做一哥」之氣概。
記者：徐影龍 攝影：陳偉強
微軟今趟在港推出XBOX，經洲立互動媒體作發行，港版並非單單引入220v主機同軟件咁簡單，主機控制介面將改為繁體中文顯示，包括CD播放介面、硬碟管理等，令港版XBOX更親切易用。據負責市場推廣嘅荃美廣告周小姐稱，目前已開始計劃將多款作品陸續中文化，有需要的話重會配埋中文對白㖭，有XBOX落力推動，睇嚟遊戲中文化時代即將來臨。
雖然售價方面暫時未有定案，不過估計應在$1,500至$1,600之間，事關美國已減至美金$199（約港幣$1,552），代理表示為免水貨流入，全亞洲區盡量都會跟呢個價，若果屬實，將比PS2嘅$1,680賣得更平。遊戲軟件則較難估計，小道消息流傳如《HALO》等一啲曾推出過嘅作品，會以特惠價推出，其他同步新Game，亦會比美國賣得更平。
CraigDavison先生為XBOXGameStudio產品經理，主力開發RPG及Advanture類型Game，開發中嘅大作《FABEL》便出自佢手。
問：請簡述XBOXGameStudio背景。
答：主要分四大部門，包括製作部、美術、編寫程式及測試等，雖成立不久，不過內裏全是年輕嘅精英。
問：XBOX遊戲開發環境是否三大主機中最容易？
答：由於PS2及GAMECUBE各有一種程式語言，遊戲商需慢慢適應開發環境，XBOX則使用電腦嘅C語言，並非強調簡易開發環境，只不過係全球有好多人懂得編寫相關語言，技巧會較純熟較易啫。
問：對目前三大主機有咩睇法？
答：由於XBOX為三機中最遲推出，故在硬件技術上會較為領先，加上內置硬碟及網絡插頭，實用性及擴展性都係最好嘅。不過個人頗為喜歡任天堂嘅《Mario》同PS2嘅《GT3》。
問：對陸續加入之日本大廠如世嘉、CAPCOM等有咩睇法？
答：世嘉製作好多出色嘅Game，尤其東京遊戲展內曝光嘅《PanzerDragon》更令人印象難忘。至於CAPCOM則冇乜印象。
問：會否像PS2推出如LunixKit嘅開發套裝，供業餘人士自行開發XBOX遊戲？
答：由於開發XBOX遊戲必須先有一部Debug機（透明綠色那部），故暫不考慮推出相關套裝。
今次微軟推出港版XBOX，並非求祈將電壓改為220v就算數，當中配合市場推廣花了不少心思，如邀請產品經理訪港、更改港版XBOX手掣等，尤其係中文介面嘅XBOX，令人感到微軟對亞洲市場之重視及誠意，可惜目前大部份作品都偏向美國風格，對亞洲市場嚟講未夠吸引力，展望將來世嘉、CAPCOM等日本大廠推出XBOX獨家王牌遊戲，配合XBOXLIVE網絡發展及遊戲中文化，要在市場爭一日之長短絕非冇可能，相信機迷亦喜見百家爭鳴嘅局面。
主機性能點勁點好都係次要，最緊要有好Game支持。據代理表示目前仍未確定首批作品數量，不過XBOXGameStudio旗下作品一定會登場。今次重點介紹尚未出街嘅《BLINX》、《MetalAssault》及採訪當日（10月5日）啱啱收到Sample版嘅《QuantumRedshift》。
《MetalAssault》炸冧樓恐怖分子啱玩
Free
前作曾在PC登場，主要以任務形式消滅版上之敵人，最特別係可隨意炸毀街上建築物，幾十層樓都照炸，重可作壓毀敵人之用，夠晒Free，不過試玩後發覺電腦A.I.頗強，單對單隻抽已經唔係咁易，遇着幾個敵人圍抽，情況真係不堪設想。
《QuantumRedshift》戰鬥版星戰賽車
爽
筆者撞正代理啱啱收到呢隻Game嘅Sample，即刻拆盒試玩。遊戲十分似《StarWarRacer》，以六艘古靈精怪嘅太空船鬥快為目標，不過就加入武器及防護罩等系統，試玩後發覺非常之爽，地形變化比《StarWarRacer》更靈活多變，更有十多款戰機以隱藏形式登場，令人期待。
《BLINX》任天堂遊戲炒雜錦
靚
遊戲非常七彩繽紛，似足《陽光瑪利奧》，貓形主角可以好似Mario咁二級跳，手上的工具如同《路易鬼屋》般是一部吸塵機，吸取地上物件再射出攻擊敵人這個玩法，則如同任記一個比較幼兒化的遊戲《星之卡比》，要在一定時間內消滅指定數量嘅敵人，最有創意係加入時間控制Item，如暫停、回帶等，令戰鬥時增加不少趣味。
為配合宣傳，微軟專誠請嚟旗下XBOXGameStudio開發部嘅CraigDavison先生，為筆者解答港版XBOX之種種提問。據公關講呢位外表年輕有衝勁嘅Craig，精通XBOXGameStudio眾多遊戲，屬高手一族。機會難得，梗要搵番幾個香港打機高手，會一會呢位Craig先生啦。切磋遊戲揀番XBOX全球最高銷量嘅《HALO》，兩部XBOX駁埋玩八人混合大戰，惡鬥一輪後始終俾Craig一個威晒，香港代表全軍覆沒。事後參與者之一嘅Samuel重話：「玩落已經知佢勁，中途大家已有共識合力對付佢，點知七個人聯手都打佢唔低，真係冇晒符。」Craig亦好有風度咁回應：「香港人普遍打機都好叻，連小朋友都係高手，希望有機會搞個世界性嘅《HALO》比賽，等大家認真較量一番。」
機迷點睇XBOX
Angus（Sales，8年機齡）：「XBOX優點係超強嘅圖像表現能力，加上嚟緊嘅大作同XBOXLIVE，相信到時我都會忍唔住成為XBOX機主。」
Samuel（遊戲示範員，10年機齡）：「淨計CPU已經贏晒，畫面夠靚之餘，Game嘅風格都幾啱我玩，尤其係世嘉嘅《PanzerDragon》等日式大作推出後，到時XBOX個勢會幾勁吓。」