梁朝偉拍澤東公司以外嘅戲，片酬叫價成六百萬。如果喺電影業好景嗰時，好多公司都會畀得起呢個價，但𠵱家咁嘅時勢，當然唔得啦！好似嘉禾原本想搵偉仔拍賀歲片，𠵱家都縮沙，因為條數計唔掂，有高層提議搵叫價二百萬嘅任賢齊代替，等小齊配楊千嬅，咁成本就平好多。
馮仁昭聽到其實嘉禾都未落實係咪一定開賀歲片，因為計唔掂條數就唔會博，𠵱家嘉禾開戲好鬼穩陣，噚日打電話畀嘉禾發言人杜惠東，佢話：「係咪搵偉仔，公司都未定，賀歲片係咪一定開，一樣未諗掂。嘉禾唔同林建岳嘅寰亞，為咗省招牌可以將劉德華同偉仔擺埋一齊拍一部戲，好多人都會驚蝕本，因為華仔同偉仔嘅賣埠價都大不如前。」
王秀琳（Mango）噚日去咗西九龍中心宣傳佢嘅新唱片，佢重同現場觀眾一齊玩撈金魚遊戲。問到Mango對於王菲加盟佢所屬嘅新力唱片，佢好開心咁話：「我歡迎佢加入，我都好希望有一日可以有機會跟王菲學唱歌，不過暫時唔會向公司要求同王菲一齊合唱。」Mango咁想跟阿菲學唱歌，唔知阿菲肯唔肯教佢兩招，等Mango有機會繼續出碟呢？
張惠妹前晚喺南京舉行個人演唱會，呢次係佢上次交通意外撞傷頸部後，首個大型個唱。佢前晚喺舞台施展渾身解數，阿妹嘅一輪勁歌熱舞，大受現場觀眾歡迎。
雖然當時落住毛毛細雨，但冇損歌迷嘅熱情，觀眾都睇得好興奮，現場氣氛好熱烈，而阿妹嘅衣着依然好鬼性感。
玉女歌手同年輕偶像拍拖後，人氣急跌，好似佢早排出咗張碟就銷量麻麻。唱片公司其實都有啲唔高興，因為覺得佢宣傳做得唔多夠。玉女歌手又真係唔夠專業，因為佢為咗愛情，呢排有乜工作都唔願做，但係佢老闆又錫佢，所以從來唔會強迫佢。之不過佢繼續係咁落去，睇怕都冇人再敢搵佢做嘢。
台灣男子組合F4嘅成員之一周渝民（仔仔）為咗工作，早前休學，但佢得到經理人嘅鼓勵之後，花咗一個月時間苦讀，接受學校重考嘅安排。聽講佢就快可以復課，仔仔日前話：「我真的希望可以繼續做學生，無論怎樣辛苦都希望在學校讀書，認識朋友。」據知仔仔為咗呢個考試，連日苦讀，瘦咗差唔多七磅，睇嚟仔仔嘅fans一定好心痛。
導演唐季禮喺上周五（四日），同一個着得好性感嘅女仔，一齊喺內地出席中國國家足球隊嘅前國腳申思嘅婚宴。唐季禮見到有記者影相，即刻彈開，嗰個女仔重好醒目咁用個背脊迴避鏡頭。唐季禮早前俾台灣記者見到佢同林心如由泰國外旅返台灣，唔知今次同佢一齊嘅女仔又係邊個呢？
好洋化嘅歌手夫妻，呢輪喺娛樂圈好活躍。佢哋兩公婆最鍾意結交啲有錢人，特別係同某著名富豪夫妻最老友。原本佢哋喺娛樂圈都有一個識咗好多年嘅女星朋友，呢位女星未嫁人之前同佢哋好老友，嫁咗之後同佢都經常有來往，但近年嚟歌手夫婦同佢就因為啲誤會搞到反晒面，歌手夫婦同啲朋友講，話呢位女星好小器，所以唔做朋友都唔可惜。