幾個衣着入時、頭頂五顏六色、哭哭啼啼的女fans，在茶餐廳卡位一角，抓住手機，有一句冇一句，邊擤鼻涕邊說：「頂包，超，又唔係廿三條，使乜咁重手。」
「頂包嚴重過廿三條？……×你呀，你估你係保安局長！」其中一個用搽了藍色甲油的手指大力捻薄荷煙屁股幾下，破口大叫。
「最頂癮是那幅囚車中的冷笑相，真正型仔到震。我把它貼堂，成張《蘋果日報》過晒膠，當窗簾用。阿媽都頂我唔順。」穿小背心的索女破涕為笑，得戚地用高八度嬌聲說。
「愈反叛愈有睇頭，乖仔太扮嘢，out晒啦。我鍾意偶像行差踏錯一下，就好似某些專家講，天皇巨星從神壇跣腳跌下來，反而拉近同fans的距離。」一個頗老積的擁躉似模似樣分析說。
「咁，你估下一鋪，他會不會故意……踩廿三條。橫掂已經衰過，唔怕衰多鋪，衰廿三，更激更轟動！」一言既出，眾女亢奮得手舞足蹈。
「保安局長搵個靚仔祭旗……你估會唔會，兩個又試擦出忘年戀火花？保安局長阿媽係粵語片明星仔，嫁人做妾侍，個樣唔曳。」其中一個翻出今期《壹週刊》，眾女傳閱，埋單離去時還一路爭拗打賭，估「邊個女強人有廿三條仔咁勁呢吓……？」