楊恭如前日在銅鑼灣被一少婦當眾掌摑，對方還怒指楊恭如：「你做乜搞我老公！」而楊恭如的經理人文雋昨日承認她曾被襲擊，致受驚失眠，並謂有意請保鑣保護恭如。
楊恭如前日下午在銅鑼灣COVA餐廳內，遭一名少婦當眾掌摑，對方還怒罵恭如說：「你做乜搞我老公！」令現場人士為之側目。楊母事後到場即激動報警，楊恭如則以上海話對母親說：「佢又搵人打我呀。」惟警方到場後，楊恭如又表示不想追究。昨日楊恭如則透過經理人文雋向傳媒表示：「我冇事，多謝大家關心。」但文雋表示恭如前晚因受驚引致失眠，睡得不好。
昨日約一時左右，楊恭如的經理人文雋及羅嘉慧，同坐的士到楊恭如位於裕景花園的寓所，逗留約兩小時後便乘的士離去，而楊恭如則整天由母親陪伴留在家中。
而文雋昨日接受電話訪問時，講述事件經過，他說：「噚日（指前日）係我約咗恭如同佢媽媽喺COVA傾嘢，佢哋早到咗，坐咗冇幾耐，突然有個女人喺恭如後面撲出，大力推佢背後一下，恭如俾佢嚇親就本能反應縮一縮，個女人就再喺恭如頸部好大力咁拍咗一下。恭如冇俾人摑到塊面，個女人亦冇講到乜嘢搞人老公嘅說話。當時恭如媽媽咁啱去咗廁所，出到嚟見到咁情況就大聲喝止個女人話：『喂，你做乜嘢？』個女人就即係走咗，成件事發生唔超過兩分鐘。」
文雋又表示他們完全不知道對方是何許人，及有何打人動機，文雋又指當時恭如母女都十分驚慌，恭如更被嚇呆，楊母遂致電給他並報警，以保人身安全。文雋說：「恭如都冇受傷，好小事啫，冇去到驗傷。其實香港係法治之區，我哋冇諗過因為自己係知名人士而唔報警，𠵱家備咗案，等警察做嘢，我哋就唔會有任何行動住。恭如一向係乖乖女，孝順又單純，從來都冇仇家，但今次發生咁嘅事，佢以後出入都會小心，我哋都擔心佢安全，會考慮請保鑣保護佢。」而警方昨日稱此事列作求警調查案件，前日事發時當事人稱不欲追究。
對於有指楊恭如是因搶人老公才會被襲一事，文雋說：「冇咁嘅事，大家唔使作任何無謂揣測。」
此外，記者昨日到過肇事的銅鑼灣COVA餐廳了解，餐廳所有員工對楊恭如被打的情況都三緘其口，而餐廳負責人江經理接受訪問時，只說：「我哋噚晚已經講咗唔會再回應。」態度似乎十分避忌。
採訪、攝影：李珮洳、王連連