「下個星期六如果冇好地方去，不如嚟澳門同我哋一齊博拉。」嘩！邊路人馬會搞啲咁嘅宣傳招數，就係班唔怕死嘅漫畫家尊子、馬龍同埋本地小子等人喇！
試過九九年喺澳門回歸日冇申請而作街頭表演而被拉被鎖，今次澳門嘅文化團體「石頭公社」同香港一班漫畫家就學精咗，已經向當局申請，呢個禮拜六在濠江望得堂區瘋堂斜巷嘅婆仔屋舉辦一個叫做「港澳報刊漫畫人」作品展，個地址係真嘅，點去八方都唔知，不過，應該實搵到，因為澳門好細。
主題：神奇掃把對法輪俠
至於展出乜嘢作品，尊子就唔肯透露，上次佢老哥做咗江澤民嘅人頭像四方紙盒，畀人戴住嚟演街頭劇，今次就會將漫畫立體化，主角係邊個，暫時賣個關子。咁究竟又怕唔怕再被拉呢？尊子竟然答話「好難講，或者有事，或者冇事。」
其實上次被扣四個鐘，尊子話都唔知乜嘢事，不過今次個作品展嘅海報已經夠晒激，題材係「ART.23comics」，即《基本法》二十三條漫畫，「WonderBroomvs.FALUNMAN?神奇掃把對法輪俠」，都唔慌少嘢。香港為二十三條立法，濠江馬上跟風，兩地市民可謂唇亡齒寒，唔睇住點得。
傳真︰2623-9278
電郵︰