港股已連跌5月，踏入第6月，跌勢持續，恒指由5月17日的12021高位回落，到跌穿9000大關，跌幅已超逾25%，以一個中期跌市而言，時間足夠，跌幅或尚差少許，相信大市在8800水平會找到支持，在官股全部去貨後，將會出現反彈，初步目標係9400，較強阻力在9月2日高位10045。
大市跌咗咁耐，仍然未有起色，但最「慘烈」時刻──仙股股災──經已過去。本欄之前引述「大師」之預測，話今年農曆5月及6月係最差嘅月份，股市人人唔見錢，不幸而言中。香港一眾小股民，經歷了三四線「股崩」式的下跌，欲哭無淚。今時今日，唔少股仔仍在低位浮沉，元氣大傷。
根據「大師」所講，今年農曆11月，亦係一個唔好嘅月份，屆時亦可能會有突發事件，而令股市大跌。家下距離農曆11月（12月4日至03年元旦），重有兩個月時間，大市會否一如所料，在未來兩個月營造一次中期性反彈，之後又再落過，屆時可能會再度尋底。
講完股市，再講樓市。過去5年，本港樓價由高峯回落，幅度已達6至7成，其間香港政府試過多次救市，但除帶來曇花一現的刺激外，並未能扭轉跌勢，地產商為促銷，不斷減價、劈價，將香港市民的信心劈到谷底。今次，政府又要救市，但港人信心已被徹底摧殘，重建談何容易？
傳港府將會在本周宣布托市大計，來來去去，不離停止賣地、停售居屋，以及放寬樓按成數等招數。要樓市復甦，除重建港人信心外，必須調節供求，因此，停止賣地對救市是最有效的方法。雖然現時唔再賣地，供應情況要兩三年後才得以反映，但在一定程度上會拖慢地產商在未來一兩年的售樓進度，供過於求一解決，樓價自可轉穩，甚或回升。
港府要救樓市，必定要做得徹底，否則唔湯唔水，只會再製造更多負資產業主，令消費疲弱，經濟轉好遙遙無期。地產股大幅回落後，新地（016）和恒地（012）已有轉穩迹象，由於有預期的利好消息，可伺機博反彈，長實（001）亦可考慮。
郭兆誠