近期個市咁鬼悶，小初上周五一收市，就拿拿臨同班老友去打波，點知又撞見靚女經紀，記得早兩個月佢講過，有個朋友想同江山控股（295）批股，但到家陣都冇聲氣，小初重以為搞唔成。
靚女經紀話計劃仍然進行，有間證券行上周幫公司遠赴星洲搞咗一場路演。靚女反問小初，有冇覺得江山近排股價雖然仍在25仙水平橫行，但成交就明顯較兩月前活躍，幾乎日日成交股數都過千萬。此外，江山管理層都算進取，早排先至分拆做環保生意嘅泓迪（8143）上市，近排又傳聞有間做智能建築業務嘅附屬公司都想分拆上市。
不過，小初則唔係咁睇，早排高富民證券話會全面收購國際融資（8004），除咗每股3仙之外，另外重有一個option可以換取江山嘅股票。由於有呢批街貨存在，或多或少都會對江山股價構成陰影，但靚女就話，國際融資收購單deal有排都未搞得掂，唔使咁早就擔憂。
慕容小初