新鴻基地產近年積極進軍內地，但係絕對唔會盲目投資。何解？睇佢地新一期季刊就有答案。
季刊一篇文章提到，副主席郭炳聯話，香港喺好多方面都較珠江三角洲嘅競爭對手優勝，但若果到內地投資，佢就提醒大家：「香港地產發展商必須做市場調查，搵出顧客真正需要，千祈唔好假設內地消費者嘅口味同香港一樣」。
新地喺本港好成功嘅商住項目沙田新市城市廣場，郭生都只係話，喺開拓珠三角嘅零售同住宅時可作參考。睇嚟佢都唔會將呢個項目照搬去中山嘅發展度。
新地喺內地嘅房地產項目，較為人熟悉嘅有北京新東安市場，以及曾經來港發售嘅上海名仕苑。
另外，季刊又披露，新地半山寶珊道1號嘅資料，合共有58個單位，56個逾1350至約3000呎。其餘兩個係頂層相連戶，分別逾5100及5800多呎，兩伙天台都設私家泳池，早前其中一個就以7500萬賣咗。
跑馬地禮頓山至今共有三十七宗租務成交，其中二十二宗喺上月初交樓打後一個月達成。美聯將呢幾十宗租務做咗個小統計，幾有參考價值。
喺咁多宗租務中，最多人租嘅係第九座，共十五宗（唔通風水好啲？），而以呎數計，最受歡迎係1911呎。美聯劉文華話，因為呢類呎數同大啲嘅單位都一樣有四房，所以受歡迎，佔十宗。
若以月租計，最平係第一座中層B室，1206呎，每月三萬三；五座低層B室就要成七萬五，貴咁多原因係有成2238呎，計番每呎三十三個半，唔算貴啩。
另一樣比較特別，就係呎租最平同最貴都喺同一座，第九座最平有兩個，每呎二十六蚊；最貴得一個，要三十七蚊。原來第九座咁旺市，買咗呢度嘅業主都可以唔使憂租唔出。
9月份啱啱過去，蘭西睇番中原網頁，發覺中記上個月生意全線下滑，香港住宅跌得最甘，宗數減24%，佣金縮成31%。計埋成個月，都係得7219萬元，睇怕打和唔使蝕已經執番身彩。估計最主要係冇咗好似馬灣珀麗灣賣得咁好嘅一手盤。近日政府托市言論對樓市起正面作用，今個月睇怕可以好番啲啩（見表）。
不過，細心啲睇，有樣嘢大家可以研究研究，就係中記中國部做到2868宗成交，比香港住宅部多，而且重唔止一個月係咁，究竟有乜微言大義？
深井碧堤半島熱賣，售樓部掌舵人黃光耀心情靚靚。話說上個禮拜五黃光耀喺碧堤示範單位講完樓盤最新銷情後，請小記們到場內食肆歎下午茶，巧遇將開記者招待會嘅Lcx區域市場推廣經理徐綺漣。黃生即加入推廣，重充當導遊講解尖沙嘴商場最新面貌，順道帶大家去睇海運大廈3樓商場翻新後嘅入伙面貌，及未來海運大廈摩天輪入口處參觀。
上次蘭西同徐小姐做訪問時，佢重未嚟呢間公司，問黃光耀用乜方法請佢過檔，佢回答話：「重金禮聘！」
個市咁差，係人都話投資者絕迹，但凡事有例外。大埔康樂園炒家喺短短五個月內，轉手賺二百幾萬，都算犀利。聽埋中原周文豪講呢個業主嘅往績，先至真正厲害。
話說喺美國九一一事件發生之後，人人趕住出貨，個市跌到七彩嘅時候，呢位仁兄竟然大手掃入六間康樂園屋仔，夾埋用咗六千萬。其中一間係銀主拍賣貨，三千呎大屋以873萬扑槌，每呎2910蚊。揸咗唔夠半年就有人買，盛惠千一萬，漲價兩成六，賺咗227萬。其餘五間屋，買入價冇銀主盤咁平，現市況下轉手冇肉食就將之出租，價好先出貨。呢個炒家真夠勇。
政府9月底突然出口術托樓市，地產商同代理行即時「食住上」，齊齊表態支持，希望增強買家入市信心，部份代理行當晚喺分行張貼標語，反應極之迅速。
市區業內人士反應夠晒快，離島又點呢？蘭西喺離島見到啲代理行，門口完全冇異樣，好似覺得同佢哋冇關咁。抑或係佢哋覺得政府冇料到，費事搞咁多呢？
蘭西
電郵地址：