呢晚同一班老友記吃晚飯，大家無所不談，電視C最多嘢講。電視C手下靚女如雲，人人聽教聽話，俾佢訓練過嘅，大有前途，無怪啲靚女對佢甚為信服。問電視C：「電視節目有乜好發展。」電視C眼睩睩話：「使乜有進展，睇住無綫就得」。喂香港唔止一個電視台噃，淨係有線都有十幾個台，播映唔同節目啦！電視C話：「你係外行人，唔知咁多，我哋做過調查，例如同一時段，幾個台一齊播放董特首演講，理論上無綫應該佔優，但點會優到百分之九十㗎，收視率俾佢搶晒，即係話香港觀眾，不論身份身家，都係唔識得轉台嘅，無綫播乜佢哋就睇乜。」
咦，以前有跨國調查公司做過電視觀眾口味調查，好似話香港人鍾意多啲節目選擇，多啲電視台選擇嘅咩？電視C大笑：「呢！香港人答問卷就要演嘢，以示自己夠多元化、多趣味化、有求知傾向，於是啲抽樣調查就中晒招，發表報告，話香港人咁咁咁，其實就同現實不符！我哋依報告結果做一啲多元化節目，死梗。」
旁邊電視H插嘴：「香港人答問卷調查，有一樣一定唔會吹牛嘅，就係收入多少，一定係答少啲，扮窮實冇錯！」諗深一層，電視觀眾亦係報紙讀者啫，佢哋嘅口味，唔使跨國公司做調查啦，一睇就知。睇乜嘢呀，睇《東方》、《蘋果》兩大暢銷報囉，做吓呢兩份報紙嘅內容分析（contentanalysis）就明白香港人嘅興趣所在啦。