當筆者以為明年或後年，便可一嘗駕駛以燃料電池（FuelCell）作驅動燃料嘅車輛時，豐田同日產車廠於早前便宣布，將會合作發展混合動力系統（Hybrid）。現時，豐田已有Prius混合動力車種（下圖）喺市場上發售，呢類Hybrid車輛設有一台引擎加一副摩打，摩打由電池驅動，停車起步時用摩打行車，直至車速去到一定程度，例如在公路上行車時，便由引擎發揮輸出力，因此耗油量會較傳統汽車低好多。目前，全世界只有豐田Prius房車同本田Insight雙座位小車，係用作生產發售嘅混合動力車種（但後者未有正式輸港，只有水貨發售）。
今回日產同豐田嘅合作，為期最少10年，先由日產向豐田購買現有嘅Hybrid配件，使日產可以直接獲取製造Hybrid嘅基本所需；而喺Hybrid技術開發上，日產係較豐田及本田等車廠來得落後。
文：陳自齊