上禮拜五美股又散過，港股好難有運行。恒指一周跌243點，睇嚟未跌夠，9000關話咁易就會失守，然後去年911後低位8894又守唔住。歐股美股，度度都低過去年911後低位，港股衰多幾百點，一啲都唔出奇。
上周跌市中，中移動（941）有70仙進帳，跑贏大市，叫做逆市而升。短期大市寒意襲人，中移動都好難繼續獨善其身，上禮拜六話急升後嘅中移動Call輪追唔過。想玩兩手，可以打吓中移動Put輪主意，正路對象係交投最多嘅9549，明年3月底到期，現價39仙，溢價6%，槓桿率4.8倍，其次係9440，明年1月底到期，現價38仙，溢價3.4%，槓桿率5倍。
美國金融類同銀行類股份，上禮拜好弱，普遍唔見近1成。滙豐（005）上禮拜共跌2.50元，與大市同步，但叻過美國同類股。美國同類股咁跌法，即係滙豐未跌夠，上禮拜五頂住80元，短期內無法唔失守。想搏殺嘅，諗滙豐Put輪，搏殺程度高低依次係9234、9123、9366、9332。
大市儘管睇淡，但都要咪一面倒，轉身要快。窩輪炒1日叫做短線，兩日叫中線，3日叫長線，盡可能快快趣趣鋪鋪清。
章盛