但凡開倉，最短都會做一星期，但潮流品牌QUIKSILVER就不顧一切，只在重陽兩天公眾假期促銷，如果漏睇報道，咁就真係走寶。其實，他們逢季頭都會開倉一次，部份貨品更低至二折發售，今次有2002的新款秋冬衣服，而且尺碼、顏色及貨量都十足，差不多只要睇中，都可以買到心頭好！
記者：梁佩芬 攝影：陳穎
Model：Don&Kyle
潮流死梗派一定話，QUIKSILVER都係Fashion，講乜嘢功能唔功能，又係貪時興，着上身有幾多人識滑浪呀，但都唔可以否定這牌子原先是想給予玩水的人，有一套功能良好的衫褲，方便玩樂又着得舒服。
雖已入秋，但天氣持續不穩，時晴時雨，如果你好似小記唔帶遮出街，最好辦法就帶多件可以擋風擋雨的風褸。這件薄風褸，質料以Polyester為主，最大功能是跣水，可以抵擋毛毛雨威脅；加上有保溫作用，入到冷氣地方可擋寒流。有卡其色、黑色、墨綠色及灰色任擇。
香港冬天大約徘徊喺十一、二度，有時着件夾棉褸都頂得住，尤其後生仔，內裏着件長袖T-Shirt就最啱，望落唔臃腫又活動自如，周街玩都好方便。有藍、灰及黑三色。
QUIKSILVER的童裝Tee，最大的XL都只係比男裝的S碼細少少，不少女生都鍾意買S及M碼，愛谷身材的男生當然要買嚟看門口。但買童裝長袖衫一定要記得，度完身闊及長度，就要度埋手袖長度，費事買返屋企先知隻袖短咗成吋，就無得救啦！
Roxy為女裝系列，設計以自然Feel為主，配合滑浪型女的性格，鮮豔顏色居多，剪裁貼身，令身材更顯玲瓏浮凸，將自己最好一面展露出來。今次開倉，Roxy牌Size最多最齊，無論你係咩身形都可選到幾件。
大PatPat的女仔最啱就係着無褶又淨色的半截裙，如果上身加件花T恤，就可將視線轉移到身體其他部份！不過，半截裙都好蝦人着，小腿粗同腳短者，為免自暴其短就要忍手勿買。
受日本持續鼓吹古着風，連一向走歐美系列的Roxy都設計不少中袖衫、橫間條衫及彩花圖案。牛角Tee最適合一些膊頭有肉又比較橫的女仔着；橫間條係Slim女仔首選；而彩花Tee就乜人都啱。不過各款顏色都比較單調，甚至只得一款可選，是美中不足之處。
前面睇，件背心無乜特別，全咖啡色又樽領有點老土；但從後面看，原來有幾個圖案放在衫尾，簡單又低調，與Roxy鍾意玩花喱花碌風格大相逕庭。而側邊有拉鏈，拉開衫身鬆啲，方便內裏隨時加厚衣。不過抓毛最唔好係容易起毛粒，尤其懶人唔用手洗放入洗衣機，折舊率其高。
冬天着件長毛大件衣累贅又麻煩，所以近年興起Fleece。質地柔較又暖笠笠，最重要衫身薄裡，剪裁貼身，無論下半身襯乜都咁好睇，百五蚊都唔使就有件，重唔係必搶貨之一？共有三款顏色任擇，綠＋白、黃＋藍及藍＋白。
買完衫，都要留意吓店內其他周邊貨品，波鞋、背囊唔少得，還有皮帶、銀包及相簿供選擇，大多以三折起出售。
Globe一向是板仔最鍾意的品牌之一，貪其價錢平、款式多，最重要是啱香港人腳形，唔會又厚又大，着到好似隻龍船咁，就「型」字欠奉。一次過六款波鞋齊碼又齊色開倉大減價，以往一對價錢，現在可買三對，真係有買趁手。
QUIKSILVER以水着為主，入秋後都冇乜理由再Sell泳衣短袖衫褲，唯一可以代表就輪到一系列的沖涼用品，就算冇去沙灘游水，喺屋企洗白白都好啱用。鍾意化妝的女生，更可買埋顏色唇膏，但各款用品都帶有濃烈香味，鍾唔鍾意就見仁見智喇！
香味磨砂
貨量：50件
原價：$120
現售：$38
肥皂及肥皂粒
貨量：各50件
原價：$60
現售：$18
香薰蠟燭
貨量：50件
原價：$120
現售：$48
粉紅色LipGoss
貨量：50件
原價：$50
現售：$25
QUIKSILVER
開倉日期：10月13-14日
營業時間：12:00noon-9:00pm
地址：旺角新世紀廣場387及388號舖
電話：22643088
＊衣服不設試身，鞋除外。
＊買滿$1000或以上可用信用卡。
＊所有價錢，以QUIKSILVER當日標價為準。