藥王T本來係賓架，做到副老總，前年因大佬盤中藥成藥生意甚為好景，需要幫手，於是唔做賓架，轉行去賣藥，成為家庭企業嘅老總，左丁山每次見到佢，都向佢請教保健食品之道。最近好多朋友，屬於型男型女之類，竟成為啪丸專家，甚麼去油丸、減肥丸、通心丸、銀杏藥丸、大蒜丸、阿士匹靈、維他命B雜，以至靈芝丸、雲芝精華、六味地黃丸等等，一日食十粒八粒，等閒事耳。
左丁山問藥王T：「食咁多丸，係唔係有用㗎？」藥王T話：「你哋肯食，我當然最高興，事實上，人人體質唔同，需要唔同，好難一概而論，你日日寫嘢，晚晚唔返屋企食飯，恐怕膽固醇會過多，兼過份疲勞，就應該食番一啲嘞。」
問料變成俾人推銷，乃始料所不及，但諗諗吓，成班賓架都耳語話阿松哥常吃靈芝兼維他命B雜，所以半百之年，仍可迎娶二十零歲女，應付得來噃，即係話食丸可能都係有功效㗎啦，唔可以話藥王T硬銷啫。好似係蔡瀾講嘅，男士結婚，對象最適宜係自己年齡除二加七，即係五十二歲男士，對象就係三十三歲，三十歲男士，太太最好係二十二歲。以此標準，梁太年齡係好年輕，梁生要好好精力至得。蔡瀾幾時講過，唔記得喇，總之佢對男女之事，極有研究，信佢好過信政府能夠托市，眾男士有七年之癢之時，不妨重溫蔡瀾之言。