響今屆法國巴黎車展上，德國奧迪車廠展出咗多款新車，令在場車迷感到目不暇給；而當中最矚目嘅就係新一代S4系列，造型不但較前變得狠辣之餘，當中嘅Avant旅行車版，重有頗高實用性㖭。今日不如就趁新車響明年中推出前，一齊嚟先睹為快啦。
新版S4Avant與原有型號一樣，狠辣嘅造型設計已成為賣點之一，但新車卻顯然來得更突出；除有電鍍鬼面罩及全新氣霸組合外，一套18吋跑車合金胎軨，響四輪拋沙板設計襯托下，一派高性能跑車形象完全表露無遺。另外重有多種專用顏色供車迷選擇，以凸顯其身份㖭！
打開車門後，一對Recaro跑車桶形座椅會將你深深吸引住，加上有高承托性兼可作多段式調校，就算作長途行車，都仍可予人有一個舒適愜意嘅旅程享受；當然唔少得重有設備齊全，兼且方便易用嘅一體式中控台組合、S系獨有嘅三幅式跑車軚環，以及寬敞闊落嘅尾廂空間啦！
廠方為新版S4Avant，裝上一台4.2公升V8引擎，馬力輸出高達344ps/7000rpm，41.8kgm扭力峯值，則於引擎處於3500rpm時發出，匹配一套6前速CloseRatio手動波箱，無論起步加速都有出色嘅表現；難怪新車0至100公里加速度僅為5.8秒，而極速更可高達250km/h咁快啦。
而由前輪四連桿，以及後輪多連桿所組成嘅懸掛系統，加上有四驅系統及剛度十足嘅車架輔助下，亦可令車子有出眾嘅循迹表現㗎！