英皇最近公開招募Twins新成員，遲啲Twins除咗蔡卓妍（阿Sa）同鍾欣桐（阿嬌）之外，重會加多一至兩位新成員。
日前馮仁昭喺荃灣遇見Twins，同佢哋傾開偈，阿Sa話都有聽過有新成員加入嘅消息，不過佢同阿嬌都話冇乜感覺喎！阿Sa重提議第日Twins加咗人之後，可以改名做「Twins×1」、「Twins＋1」或者「TwinsPlus」。
年尾Twins會出新碟，到時新成員應該已經加入。阿Sa覺得新成員必須具備三大條件，佢話：「開心最緊要，我同阿嬌都冇煩惱嘅，又要身體健康，要捱得吖嘛，最好有啲跳舞底子。」馮仁昭笑阿Sa話咁嘅條件，開心果肥姐個寶貝女欣宜咪好適宜加入？
講到身材，問阿Sa係咪要好似佢哋咁冇乜先算合格呢？佢即刻扁嘴話：「唔關事，我proudof（驕傲）自己身材，𠵱家興（微波）呀。」對於有傳Twins加入新成員係為咗撼九人女子組合Cookies，Twins就話：「大家唔好攞Cookies嚟比較，我哋係唔同嘅團體嚟㗎。」
徐若瑄（Vivian）同埋優香合作主持日本搞笑節目《ChanomaGirls》後，佢兩個近日再獲任命主持清談節目《優香同Vivian齊齊修行》，每個星期邀請社會各界有地位嘅名人做嘉賓。
佢兩個前日喺東京出席宣傳記者會，被問到最想訪問乜嘢人時，優香話係Mr.Children主音櫻井和壽，而Vivian就用佢「唔鹹唔淡」嘅日語話：「小泉（純一郎）大總統囉！」連我馮仁昭都知小泉係日本首相啦，唔怪得在場人士個個聽完都捧腹大笑。
好多人以為大眼女歌手同音樂人男友分咗手，其實重未㗎，只係感情淡咗分開住啫。大眼女歌手早輪轉咗公司，之後佢同公司老闆行得好埋，起初女歌手都唔為意老闆對佢有意思，不過佢一直好想發圍，但係喺娛樂圈咁耐，都浮浮沉沉，咪把心一橫，跟咗老闆，諗住老闆會出盡力捧紅佢。但馮仁昭就覺得唔樂觀，只係戥佢個音樂人男友慘，一直俾人蒙在鼓裏。
第四十七屆亞太影展前晚喺漢城曲終人散，由江角真紀子同豐川悅司主演嘅日本電影《命》成大贏家，獲得「最佳影片」同埋「最佳女主角」兩個大獎。楊紫瓊雖然有份到場爭奪「最佳女主角」獎，但係佢主演嘅《天脈傳奇》就只得「最佳攝影」獎。另一套由張栢芝同鄭伊健主演嘅香港電影《蜀山傳》，就獲「最佳特效」獎。
楊千嬅早前為內地一個運動服裝牌子喺廣州同深圳拍廣告，佢今次拍廣告啲錢真係唔易賺，因為畏高嘅佢要企喺電話亭上面，扮打網球，咁就已經嚇死佢。而且佢重要喺三十幾度高溫下，着住秋冬運動裝做劇烈運動，佢話：「好彩有班工作人員不斷買啲凍飲畀我，如果唔係中咗暑啦！」
無綫女藝人陳珮珊同前男歌手蔡濟文結束十二年愛情長跑，佢哋會喺十二月二十三日結婚。問陳珮珊婚後會唔會退出？佢噚日喺鑽石山話：「我同無綫明年先約滿，如果唔續約咪同蔡濟文打理生意。我哋好鍾意BB，但係一切會順其自然，其實蔡濟文向我求過三次婚，不過我要計劃好先應承佢，我哋會喺上海同香港擺酒。」
患上肝癌嘅羅文（籮記）近日都足不出戶咁留喺屋企養病，佢啲朋友都先後去過佢跑馬地嘅寓所探望佢。籮記前助手Terry噚日重買咗豆漿粢飯去畀籮記做早餐。而張徹太太同籮記助手阿東噚日就打開籮記屋企嘅窗簾，畀陽光透入屋內。肥姐沈殿霞噚日亦同埋一位女士去探過籮記，逗留咗一個鐘。