呢排個市咁靜，好多卜架行老闆都想唔玩，班行家一聽到老闆話要開會都顯得好緊張，因為唔知會唔會收到減薪通知或者收到大信封。
過去幾個禮拜個市跌得咁犀利，早前由班窩輪發行商推出嚟嘅ELI，成交額愈縮愈有，聽講港交所（388）為咗要令個市場注意番呢啲產品，特登整個徵求中文名比賽，更攞2萬元作獎金。不過伏勝覺得個英文名的確係好難聽，皆因將ELI讀快啲就會變咗「二奶」，如果各位想攞呢兩萬蚊當年尾花紅，不妨幫手諗諗。
聽一個喺港交所做嘢嘅朋友講，歐亞農業（932）真係好大件事，皆因大股東已經「梅開二度」減持股份，加埋公司高層換咗畫又冇即時公布，簡直當啲監管機構無料到，搞到班監管機構嘅高層好㷫，話今次一定要好好懲治唔守秩序嘅公司。
照伏勝睇，大股東楊斌𠵱家在內地被扣查，但佢之前已經「投靠」北韓，做新義州特首，理論上有可能沽晒手上嘅歐亞股份，問題係邊個要咁大手貨，同埋幾時會有人要。因為若跟足條例照辦，若果有人一手攞多過29.9%的話，就要即刻向所有股東回購，分分鐘要使多好多錢，所以揸咗歐亞嘅散戶真係要自求多福。
上星期線人同伏勝講過，香港葯業（182）早前停牌宣布批股計劃已經告吹，因為有個芬佬諗住壓低個價嚟攞着數，點知俾班管理層知道，立即停咗批股，有大戶即刻話要將個價挾番上去，迫個芬佬喺市場補貨。聽講，原本批股用嚟買國內嘅醫療設施，轉做「一條龍」服務計劃，將會稍為延遲。不過，伏勝認為淨睇後面嗰部份其實都幾吸引，大家不妨留意吓。
伏勝