星期天講廿三，不是十三，吉祥定不祥，任你界定。
因為是廿三，唔使註冊，怕且也不可能成為人名。
南海廿三郎？廿三記？
廿三少？廿三妹？
廿三張最襯環境。就算你手牌至尊靚絕，別妄想能贏到保安局長。廿三張做莊，大晒，通殺。
廿三條，十隻手指難數清。但你肯定知道，擺你上枱的廿三條，不是腸粉或者粉腸。喂，不要醉醺醺淋豉油上面，放入微波爐叮佢，當周日的brunch。
廿三條，如果你依然宿醉未醒，可以想像一下，23這個數字，並非你眼金金盯了整晚的那位靚女的腰圍，或者她的粉紅色mini仔車牌號碼。而係保安局長由2002年做到2025年的任期！喔噢，幾好，你即刻清醒，不必扣喉，酒精嘔吐得一乾二淨，可以讓腸胃過半個愉快的星期天。
我卻還是胡裏胡塗，不明白23為甚麼叫做「條」。廿三，條狀好咩？襯保安局長咩？廿三條比屎更難撈，你和我不是屎撈人，惹唔起。廿三條改做廿三篤，行人免踩，更具警嚇性。搞笑些，叫廿三兜。排隊通櫃時有人問你衰乜？衰廿三，個名都響些。