天佑和又南兩位大男孩，由赴日學藝至今，日夕相對了近一年多。但原來二人留日期間，卻十分愛鬥氣，更曾為了一盒士多啤梨差點打起來。
又南回想起這件事也忍不住笑，他說：「我哋嗰時真係細個，一齊住又唔慣，喺日本時會好容易鬧情緒。嗰日大家心情唔好，出去買蛋糕同餅乾時，買完士多啤梨就喺度諗放邊個袋會冇咁易爛，我話擺呢個袋，佢就話擺嗰個袋，講講吓就嘈起上嚟。」
在日本相對了大半年，回港正式發展後，Shine對彼此的感覺卻不可同日而語，天佑說：「𠵱家大家明白係為做嘢，為生活，有時都會意見唔同，但唔會嗌交，會攞出嚟講。」
天佑坦言自己眼中的又南頗懶散，他說：「佢第一眼望埋好友善，但佢性格好懶。做嘢前要考慮過先做，其實係好嘅，但佢有時連唔使考慮嘅嘢，都要考慮埋。」
而又南則說：「天佑做嘢好果斷，話做就做，但佢唔好嘅地方係衝動，呢樣未必係好事。」
Shine在圈中不乏老友，包括有英皇的Twins及環球的余文樂等等，雖然大家不是同一間唱片公司，但友情卻不受影響。Shine說：「我哋唔會理同唔同公司，啱嘅咪一齊玩囉，我哋都係一齊去飲吓嘢，彈吓結他，唔會四圍撩人。」