人氣二人組合Shine為現今最受歡迎的樂壇新組合，不過兩位成員至今月薪僅得約一萬元，扣除給父母的家用，只剩六千元，他們都自嘲人工比普通文員還要少。但賺這幾千元的背後，仍在發育期的Shine卻表示，試過開工連踩五十個鐘，擔心日捱夜捱會營養不良兼患上厭食症。
出道至今未及一年的少男組合Shine，兩位成員徐天佑及黃又南都只得十九歲，雖然年紀輕輕，但他們今年初推出的處男大碟《燕尾蝶》，銷量竟衝破了二萬張，成績較不少歌手好。
別人以為Shine唱片大賣，又接拍了好幾齣電影，理應荷包腫脹，但原來他們每人每月的平均薪水只得約一萬元，而且還欠下經理人公司的墊支費，要按月還錢。
Shine異口同聲說：「我哋喺組成Shine之前，去咗日本上堂，學唱歌、學跳舞，都係公司畀錢，我哋每人都爭公司成十幾廿萬，但𠵱家只係還剩啲水尾，實際重欠幾多，又冇話好刻意去計。」又南還打趣說：「爭錢重好，有鬥心還錢嘛！」
又南更形容他現時所賺的薪酬，基本上是左手來右手去，經公司扣除墊支費及抽佣後，再付約三千至四千元家用給父母，身為人氣偶像的Shine，每月真正落袋的只剩約六千多元。
又南說：「收入重少過文員，但OK嘅，我同屋企人一齊住，以前讀書都冇乜點使錢㗎啦！」
而天佑則說：「我個個月都清袋，我大使呀，重搬咗出嚟住，我老竇成日叫我唔好用咁多錢，我食嘢好貴，買嘢又貴。我阿媽又係咁，有幾多使幾多，我都開始控制緊自己㗎啦。」
兩位成員賺的錢少，工作量卻一點也不少，十個月內要拍三齣電影、出兩張唱片及舉行音樂會。
天佑早前拍攝電影《五個嚇鬼的少年》期間，更試過連踩五十個小時未曾休息，這種捱更抵夜的生活，令Shine也擔心影響自己的發育。
近月來又長高了一吋的又南說：「我早排成日趕開工，過咗食嘢時間就唔想食，我幾驚係厭食症呀，𠵱家都食到嘢嘅，但個人唔肥，係咁拉高囉。」
天佑也說：「我好驚營養不良呀！阿媽係咁煲燕窩畀我補身，我冇瘦到，重肥咗十幾磅，有個肚腩，我啲肉打橫生，又南就向上嘅。」
撰文：朱芷瑩
攝影：林德雄
服裝提供：PHILTER