安雅穿衣風格一向十分洋化和自由自在，她表示加入娛圈後穿衣也有限制，所以她十分享受在美國不用戴bra的日子。她最滿意自己的背部，所以十分喜歡穿露背裝。
安雅自小在外國長大，衣着品味十分洋化，她日前接受訪問時說：「我平時好鍾意作hiphop打扮，一條闊嘅褲，再加一件tubetop已經覺得好舒服。喺美國着衫style好自由，可以好男仔頭，又可以唔戴bra照着tanktop。」
安雅續說：「我好鍾意曬太陽，咁背脊嘅skintone（膚色）都會健康啲。我平時又好喜歡着褲，因為我hip位（坐圍）三十五吋，比例算大，所以要遮住，我平時都係買褲多。」
安雅表示加入娛圈後，穿衣風格亦需調節，她笑談一段尷尬往事時說：「我啱啱入行，有次出席電影首映活動，我戴咗sportbra，不過可能冷氣太凍，我唔知自己凸點，第日報紙就寫我唔戴bra，之後公司就叫我要買bra。」
此外，安雅認為不需要緊貼潮流，尤其在香港，潮流轉得太快，她又喜歡「捐窿捐罅」買衫，她說：「我有時去金百利商場，又會去荔枝角warehouse買衫，可以買到好多獨特款式嘅衫。」她又表示曾在康城影展中遺失LV手袋，很「肉赤」，加上自己大頭蝦，所以已很少買名牌。
安雅示範的服裝出自日本品牌Zucca的設計，設計師小野塚秋良一向標榜「容易穿着」為大前提。最大特色是不提倡複雜搭配，反而常常在簡單款式中，以鮮豔顏色或details，表現單純的設計感，天真浪漫卻不失孩子氣。
以今季為例，用了鮮豔的紫色、橙色或深啡色和藍色，再於設計details上加ruffles，簡潔得來又別具心思。而安雅試穿一系列Zucca秋冬新裝後，她愛不釋手地說：「Zucca呢個collection好有民族氣息，colortone方面好搶眼，再加上啲粗皮帶，好易襯衫。」
採訪：RitaLeung
攝影：MatthewLam
髮型：BenLamofTeteHairdressing
化妝：SynniTamofYMCKMake-upStudio
服裝：Zucca（I.T提供）