組合Shine兩名成員分別來自兩個不同的家庭，出身各異，卻有着共同的理想，均希望把音樂做好，賺多點錢，讓家人安居。
又南說：「我入咗行之後，已經叫媽咪唔好做嘢，我阿爸做印刷，家姐做秘書，一家人都OK㗎！我可能明年會搬出去住，愈嚟愈多人知我住邊，屋企間房又細，我想賺多啲錢，等屋企人生活穩定啲，我想屋企人唔做嘢。」
天佑則說：「我阿爸本來做玉器生意，後尾市道唔好，間舖執咗咯，之後佢冇做嘢，我阿媽就走咗去打工，我阿哥做電腦，家姐又係做秘書，我覺得屋企幾好㗎，但我想買間好大嘅屋，阿媽有工人服侍就好啦，佢隻腳有啲事，有工人嘅話，咁就正咯。」
Shine近來在多個活動上，都成為風頭躉人物，fans眾多，吶喊聲亦最響，連Shine自己也承認他們的fans很瘋狂。
天佑說：「啲fans識寄信去我哋屋企，我試過收孖煙囱做禮物，但我又真係會着。」又南則說：「我最近連隻表都俾fans抓甩埋，唔知跌咗去邊，隻表係agnesb，唔算貴，但係我家姐送畀我嘅生日禮物，好心痛。」
各位fans，Shine有句說話要對你哋講：「千祈唔好追車，太危險啦。」緊記啦！