任天堂王牌大作之一嘅《薩爾達傳說》，每一集都可算作任天堂新機護航作品，可見其吸引力之大，可惜自從今年美國E3遊戲展後，便久未有新一集嘅消息，原來最新作《薩爾達傳說GC》隨住任天堂秋季宣傳，在日本各大特約店開始進行試玩活動，筆者適逢其會，率先為大家作一實地試玩報告。
記者、攝影：徐影龍
在舊作《薩爾達傳說64》上，憑住N64嘅強勁功能，一反傳統，將平面嘅《薩爾達傳說》完全立體化，令玩法及動作上豐富不少，難度及趣味同樣增加。嚟到GAMECUBE上，全立體表達已經冇難度，不過在畫風上卻嚟個180°大轉變，索性將主角及舞台以卡通手法表達，好處係卡通化表情比3D嘅薩爾達更為豐富，睇落冇咁「硬」，又可憑住立體做模簡單做出靈活多變嘅動作，可謂集平面及立體嘅優點於一身。卡通化表達甚有迪士尼《阿拉丁》、《埃及王子》Feel，可能顧及歐美市場都未定。
親身試玩後更覺得任天堂今次做得十分出色，卡通及立體配合得非常出色，在旁觀賞時甚有睇卡通片感覺，亦能保持《薩爾達傳說》那種風格，筆者頗為欣賞今次之轉變。
由於《薩爾達傳說GC》暫定在2002年12月推出，故此今次街頭提供之試玩版中，內容已十分豐富，在按「Start」後一共出現五大選項，每個選項均有不同玩法，當中包括以搜括道具為目標嘅「DungeonStage（城堡地牢）」、找尋年幼妹妹嘅「AdventureStage」、以控制風帆食金幣為主嘅迷你遊戲「SailingStage（風帆）」及挑戰首領級敵人嘅「BossStage」等。最好玩就係另一個冒險味極重嘅「StealthStage（潛入）」，玩法像《MetalGear》咁，一邊避開敵人追蹤，一邊解決敵人。
試玩過覺得今集在動作上更勝《薩爾達傳說64》，流暢自然，尤其係設有望遠鏡之視點，能觀望極遠處之動靜，對於預測敵人或搜尋道具更為方便。試玩版內容已經咁豐富，令人十分期待正式版之推出。
《薩爾達傳說GC》支援連接GBA功能，當連接至GAMECUBE時，GBA上便會出現一款名為《TingleCeiver》嘅遊戲，某些特殊道具須在呢個迷你遊戲內先搵到，繼而用番喺《薩爾達傳說GC》度，如「TingleBomb」等，可算非常之有用，Fans買定條連接線都得嘞。
在年尾將同時推出一款GBA薩爾達新Game，雖然只係多年前超任嘅移植版本《薩爾達傳說：ALinktothePast》，不過移植度非常之高，包括十一個地下迷宮及廣大世界觀都會保留，最特別係GBA版本提供四位玩家同玩模式，名為「TheFourSwords」，四人合力消滅敵人、交換道具，解開謎題等，相當之有趣。
其實任天堂每年都會喺春及秋季跟特約店搞一連串宣傳，在各大店舖安排兩至四部GAMECUBE供試玩，而且重係多款未出街嘅作品，如今次就可率先試玩年尾先出街嘅《MarioParty》、《METROIDPRIME》及《薩爾達傳說GC》三大重頭作品。最正係即場免費派發一本印刷精美嘅《任天堂店頭月刊》，特刊內除收錄嚟緊半年嘅大作最新消息外，重附有一隻DVD光碟，入面不但有齊新Game預告，更設有開發部名人專訪、電視廣告片段等，極具珍藏價值，以後有機會到日本，記住留意Game舖係咪做緊Promotion喇。
遊戲類型：動作RPG
對應機種：GAMECUBE
遊玩人數：1人
開發商：任天堂
發售日：12月13日
(C)2002Nintendo