大市淡靜，但路邊社消息傳出福方國際（885）稍後可能會有多少企業活動搞吓。
福方一向交投唔弱，噚日股價升唔夠1%，收2.825元，但成交金額有成1621萬元，在現時二三線股咁差嘅環境下，福方有咁既成交，真係唔講得笑。
福方自上市以來，股價愈升愈高，曾經被監管機構抦過公眾持股量不足，早前曾經出現過一次急跌，據聞與籠裏雞作反有關，但收尾炒手不負所託，將股價頂返上去，繼續維持私人派對格局。
福方早排公布截至2002年6月底止中期業績，盈利較去年同期倒退85.9％，但股價依然郁都唔郁，就已經證明隻股街貨乾到唔乾。
小初唔明福方班炒家個心究竟諗乜？日日將股價舞上舞落，簡直係燒銀紙，莫非係真人不露相，重有堅料未爆，定係散唔到貨呢？
慕容小初