雖然學歷不高，但只要肯學，一樣都會有機會。好似只係小學畢業的民仔，自知學歷有限，所以便不斷進修，參加展翅計劃、職訓局課程，希望可以學一門手藝搵食。懂得噴車的他是一名汽車技工，但他希望可以轉型成為餐廳侍應和酒店服務員。
記者：曾順珍
攝影：楊錦文、陳穎
鳴謝：K'sKitchen、VoltoMotor-BikeShop
推介一
大起底
學歷：小學六年級
工作經驗：3年汽車噴漆、1個月侍應生
一技之長：汽車噴漆
我的志願：1.侍應 2.酒店服務員 3.車房技工
要求待遇：$5,000-$6,000
禮貌周周噴車最醒
雖然我學歷唔高，但勝在做事夠勤力，而且有禮貌，所以我很有信心可以勝任侍應生的職位，因為做侍應生最重要對人客有禮和滿面笑容。我報讀過展翅計劃的人際求職技巧課程，重有張畢業證書㖭。另外，我又到職訓局讀咗三年汽車噴漆，對噴大巴、小巴等車經驗豐富，又對機件有基本認識，換迫力皮、偈油和檢查汽車絕對無問題。
1.試傳菜 一手攞三碟
民仔話自己都曉得傳菜，於是便試試他可以一次過捧得多少碟。餐廳老闆好好人咁做咗幾碟午飯考驗民仔，最後民仔攞咗三碟，佢話如果有盆裝重可以攞多啲。
2.考記性 差強人意
做侍應要好記性，我哋就安排咗一位客人任意點咗六碟菜同一杯飲品，可能因為佢唔熟菜名，只能記得其中兩碟嘅名稱。
3.熟知車油功能 攞滿分
我哋帶民仔到一間車房處，由車房師傅宋生考吓民仔對車嘅認識。雖然車房只得電單車，但民仔都能知道電單車的每個部份，如匙撻、發油器、波箱、避震等，還有不同種類的油的名稱和用途，滿分。
餐廳老闆高生表示，他請侍應的要求唔需要有高學歷或經驗，最重要是看求職者的表現和有冇禮貌，薪金約$6,000。至於記性方面，高生話佢哋會有一套菜名的代號，會教侍應分辨後，就算記性最差嗰個，一個星期都會記得晒。
推介二
大學生擅長溝通最佳管理人材
大起底
學歷：中文系學士
工作經驗：2年採購員、5年零售管理、1年補習
一技之長：推銷技巧、說流利中英文、1分鐘打字60字
我的志願：1.店舖經理 2.秘書 3.補習老師
要求待遇：$13,000
上司下屬相處融洽
我的強項係人際關係，因為每個接觸過我的人，都會樂於與我相處，無論做推銷員、老師抑或秘書，我都能跟同事或上司成功建立親切關係，這樣做起事來都能得心應手。以前我在一間時裝店舖工作，之下有5、6個員工，大家互相信任，有難題時都樂於找我傾訴，但亦會賞罰分明，故能建立威信。
1.考反應：員工偷竊書面警告
當子怡發現一位好幫得手的員工偷去公司貨品時，她會怎樣處理？「我會即刻給他一封警告信，然後要他簽名，註明再犯，會立即解僱和報警，以收阻嚇作用之餘，又可給他一個改過機會。」
2.考速記：記錄重點冇甩拖
想做秘書都要速記好至得，因為成日都要陪老細開會，如果寫字慢一點，根本都好難記下開會時討論的重點。我哋就喺子怡面前，讀一段報紙，然後要佢記下內容，最後佢記低嘅重點同內容相差無幾，及格有餘啦！
有5年管理店舖經驗的黃小姐話，做店舖經理最緊要是把店舖管理得井井有條，員工之間關係要處理得好，還要懂得應付上司，是一個夾心人的角色。所以除了有基本學歷（中五）外，還要求性格隨和，懂得隨機應變，年紀成熟的會較着數。
推介三
全能售貨員會計推銷執貨包辦
大起底
學歷：中五畢業
工作經驗：2年時裝售貨員、2年文員
一技之長：英文打字1分鐘60個、電腦文書處理
我的志願：1.任何種類售貨員 2.文員 3.接待員
要求待遇：$5,500-$6,500
返工準時執貨快
四年前我曾經在新蒲崗嘅製衣廠做過兩年接待員，除咗接聽電話外，我重要幫會計部入數Check單，不久便有客人請我過檔幫手賣電腦，但因工作種類不適合，便轉做時裝售貨員。其間我學懂怎樣埋數及推銷技巧，由於表現唔錯，獲得不少老闆讚賞，可能因為我返工準時、執貨快、負責任、肯搏肯捱，是以每份工我都做得長久。
1.推銷技巧 一味Hardsell
要Kitty即場向客人推銷泳衣，見佢將件泳衣講到天上有地下無，話最啱身材好嘅女仔着，講吓講吓，個客就俾佢游說到去試吓件泳衣，雖然最後無買，但總算成功令個客由唔想買，到認真考慮吖。
2.電話應對 大方得體
考Kitty講電話時嘅應對，問佢如果有人經常打電話搵老細，但老細又唔想聽嘅話，佢會點做呢？「我會有禮貌咁話老細放緊長假，有要事可以講低，如果佢打電話嚟就會馬上轉述佢知。」
時裝店老闆娘林小姐話，請售貨員着重的是應徵者的性格，最好是活潑開朗，整日滿面笑容，客人見到都會容易啲買嘢。此外勤奮和準時是很重要，現在一般售貨員的人工約每月$6,000。
「我要一份工」今日最後一期，多謝各位搵工一族同老闆的支持。