喺芸芸家庭七人MPV當中，本田Stream一直不乏捧場客支持，而剛踏入10月，本田香港代理經已正式引入2003年新版Stream車系，既備有同級鮮見但又具備高安全性嘅Xenon頭燈外，前排重追加有四個安全氣袋，匹配本身G-CON高剛性車架結構，加埋標準化嘅ABS連EBD裝置，確實令人放心駕駛，兼具有一份安全感㗎！
記者、攝影：陳偉林
之所以呢部Stream咁受歡迎，皆因佢有一個圓渾而流暢嘅車體結構，予人富時尚美之餘，前後一體式包圍連氣霸，匹配四輪合金胎軨組合，好有一份活力體驗。而新加入嘅Xenon頭燈連霧燈設計，重畀到你炯炯有神嘅觀感呢！
呢款2003年新版Stream，裝有一台2.0公升直4DOHC嘅i-VTEC偈，匹配5前速S-Matic半自動波箱，可有不錯嘅性能演繹外，本身G-CON低重心穩紮嘅車架結構，令行車循迹性大大增強兼具穩定力外，四輪碟煞加有ABS連EBD裝置，重畀到你有收放自如嘅觀感㖭！
賣相吸引之餘，車廂前後三排七座位設計，以上乘透氣真皮鑲嵌，乘坐貼身舒服外，表板及兩邊門壁重加有高級桃木修飾，予人有豪邁嘅觀感之餘，前排四個安全氣袋配備，重有多一重安全感。再者，Momo製嘅波棍的、四門電窗、門邊電鏡同電天窗，重有MP3功能嘅高級音響連恒溫冷氣裝置，絕對可媲美同級轎車嘅享受㖭！
呢部2003年新版本田Stream家庭7人MPV，流暢外形不落俗套，以中型車價錢便可擁有富安全性嘅Xenon大燈、前座四個安全氣袋組合，另外重有桃木裝飾跟Momo波棍的，可謂豪氣十足；惟新車賣相依舊無變化，後排亦只適合孩童乘座。