恒指浮番上9字頭，最大功臣係中移動（941），收18.85元，升55仙，國內上客數字理想，有冚倉盤入市。
威水龍虎榜上，中移動Call輪中咗4隻，排頭位嘅係9376，收3.4仙，升幅達48%，唔係齋升，有12球轉手，銀碼37萬。隻輪明年1月初夠鐘，溢價28.1%，槓桿率55.4倍，行使價23.80元，正股𠵱家做緊18.85元，同行使價有好大距離，隻輪好大機會衰收尾，不過喺夠鐘之前，一兩個仙跳來跳去唔出奇。
中移動Call輪9526同9532，比較適合睇好，中移動炒家玩上落遊戲，數據比較啱睇。例如9526，明年3月到期，現價15.1仙，溢價16.8%，槓桿率12.5倍，9532嘅條件，相差不遠。不過中移動禮拜一最低17.55元，至今已升1.30元，大市走勢未明朗，中移動唔易一口氣係咁升。急升後嘅中移動Call輪，追唔過。
第2威水藍籌係新地（016），收45.70元，升90仙。新地Call輪9371，收2.1仙，升24%，有4球易手，有人掟8萬銀落去，睇嚟最後都會飲雪水。隻輪行使價60元，有兩個月壽命，正股冇乜機會喺呢段日子升14元以上。不過隻輪一兩個仙，輸晒有限。
章 盛