由薛家燕（好姨）、梅小惠、趙學而、車婉婉同苑瓊丹等主演嘅無綫劇集《皆大歡喜》，雖然不停加插一啲新人物入去，希望增加新鮮感，但始終拖得太耐都會冇新意，所以馮仁昭收到風呢個劇集預計拍到下個月就煞科，但劇集就會播到明年二月。
但《皆》劇嘅結局劇情日前就外洩，原來好姨嘅背景係同皇族成員有好密切嘅關係，而一直爭寵嘅趙學而同梅小惠嘅兩個仔，原來喺出世時唔小心調轉咗，認真搞笑。
因為劇情外洩，唔多唔少會影響收視，無綫戲劇部副總監曾勵珍（珍姐）即刻徹查事件。
馮仁昭聽到珍姐好緊張呢件事，佢即時召見劇情外洩嘅嫌疑犯好姨同梅小惠，向兩人嚴加責問，搞到房外面嘅人都聽到。重有人話見到好姨同梅小惠被鬧到眼紅紅、頭耷耷咁由珍姐間房行出嚟，睇嚟珍姐惡起上嚟都唔係人咁品。
麥浚龍（Juno）、趙頌茹（阿Yu）、陳見飛同余文樂等，噚日去旺角出席「軟硬專才大激鬥擂台戰」。Juno早前話過自己有五呎七吋高，但記者噚日見到Juno同五呎五吋半高嘅陳見飛合照時，佢哋只係平排。到有五呎八吋高嘅阿Yu同Juno合照時，未知係咪怕高過Juno，特登彎腰同曲腳嚟遷就佢。不過阿Yu突然又話自己腰骨痛，先至會彎腰影相。
台灣人氣歌手周杰倫（Jay）喺中港台三地大紅大紫，每次推出嘅新碟都大賣，所以阿Jay嘅唱片發行權一直都好搶手，掀起唔少唱片公司嘅爭奪戰。阿Jay出道以嚟唱片都係由BMG發行，但已經決定喺今年十二月轉由台灣新力發行。新力董事長崔震東日前表示好開心，佢重話十二月會為阿Jay舉行一個盛大記者會，阿Jay嘅氣勢真係沒法擋！
彩雀雖然係選美出身，重攞過獎，但佢喺電視台成日做埋啲四、五線嘅角色，入息就梗係有限啦。不過唔緊要，因為佢最叻嘅地方就係搵男人幫忙，其實彩雀都係生電王一名，佢已經有個男朋友，不過彩雀仍然喺出面狂放生電，等老細送吓名牌畀佢。彩雀重好鍾意搵老細陪佢shopping，因為個老細可以喺隔籬負責畀錢，聽聞佢個男朋友都知道彩雀啲衰嘢，兩個人早排重為咗呢啲事嗌大交㖭。
患上肝癌嘅羅文日前出院返屋企休息，呢幾日都有好多朋友探佢。可能係一直有傳佢情況唔樂觀嘅關係，英皇老闆楊受成噚日都有去羅文跑馬地嘅寓所探病，佢由三位貼身保鑣護駕，楊受成探咗半個鐘就走咗。問楊受成攞咗乜嘢去探羅文，佢都係一句都冇答。
前晚陳淑蘭同男友William拍拖去演藝學院睇音樂劇《雨中樂飛揚》。蘭子嘅男友William更大讚女友有愛心，佢話：「之前佢屋企隻狗死咗，𠵱家又買番隻狗BB，覺得佢好有母性，好適合做媽媽。」蘭子聽到即笑笑口話𠵱家未有考慮做媽媽，佢話：「生BB要供書教學，𠵱家個市道咁差，生咗出嚟都唔知點教，都係等自己補吓身體，過多十年八載先諗啦。」
張達明前晚喺演藝學院單拖睇音樂劇《雨中樂飛揚》，問到早前佢老友吳鎮宇拍咗個壯陽產品廣告，重話要送畀達明試吓，因為有生髮作用。達明對此亦笑笑口話：「我都啱啱喺西班牙返嚟，重買咗好多西班牙烏蠅，我有仔有家庭，寧願佢送啲生髮水畀我重好過，嗰啲壯陽產品可能佢需要多啲。」