九月二十七日本欄寫過一篇《差不多先生》，對本港服務態度有啲批評，引述惡佬明對日本服務嘅擊節讚賞。一位讀者來函鬧左丁山有媚日之嫌，佢認為日本人侵略中國，至今死不認錯，全無道德，唔值得我哋讚揚、學習。
事情要分兩面講，日本過往侵略中國，係政治問題。日本人做事認真、負責、務求做到最好，係日本人嘅教育問題。日本在十九世紀維新，脫亞入歐，二十世紀成為強國，以小（國）可以欺大（國），到咗二十一世紀，中國人可唔可以壓番佢轉頭呢？假如華人重係隨地吐痰、賣假酒、做假藥、做冒牌貨、服務守舊、做事懶散嘅話，追鬼追馬咩。日本人只佩服強者，從來都蔑視弱者。國民教育程度高，公德心強，我哋學習日本人優點，揚棄其缺點，有乜唔好？
另一位讀者D就話惡佬明所見嘅茶餐廳懶散侍應多數會係（一）六十歲以上，（二）新來港同胞，（三）黑工。讀者D有此感受，皆因佢曾經因為失業三年而轉到茶餐廳工作，每日返工時間係朝七晚十，月薪四千，卒之頂唔順，所以讀者D認為本港人士不能在此行業立足。讀者D七一年中五畢業，有物流管理文憑，曾在某國營（中資？）機構儲運部工作，為助理總經理。以此經歷而喺茶餐廳捱，又確實係好辛苦。可惜現今社會上，每多如此人士，以後重會愈來愈多，政府要托樓市喎，講吓好嘞。