美股周四雖然繼續下滑，但港股噚日則有少少反彈，午後期指一度轉高水，原來市場突然傳出馬會基金大手吸納盈富基金（2800），結果收市後外滙基金投資公司公布售出1.24億個單位，銷情大為改善。聽講馬會基金重未買夠數，可能下周再買。嘩！單日就賣兩成，容咩易兩三日就售罄，今次造淡嘅對沖基金相信都幾頭痛，唔知下周會否來一次大挾淡倉呢？
大戶主要掃高中移動（941），但長和系則繼續受壓，長實（001）平收46.70元；和黃（013）跌0.10元，收42.70元。
德興集團（611）周四復牌，表示又有第三者洽購，但復牌兩日股價共跌40%，噚日收1.21元，成個斬倉格咁款，完全唔似有人想洽購買殼。黑客收到料今次都洽購買殼可能係假象，所謂嘅洽購最後可能以無疾而終收場。
德興早前宣布AmandineAsiaLimited收購其51%股權，但最後不能達成協議。周四公司又公布獲FullHouseInternationalLimited洽購。其實現時隨街都係殼，唔一定要買德興，就算成交，作價都唔慌理想，所以無謂過份憧憬。
e-KONG（524）停牌，話會重組股本兼供股。從其股價跌至１仙至跌無可跌水平，就一早知道公司會有此一着，但最慘就係股價跌至１仙後已經無成交，要沽亦難，持有蟹貨者，只能眼白白任由股份合併後大幅下挫，任由公司供股抽水，但唔供股則股權被攤薄，小股民真係無奈兼悲哀。呢一種併股及抽水行動會陸續有來，股民哀聲將不絕於耳。
阿 虎