記得四年前，小記採訪曼谷亞運女單壁球項目，心情同噚日趙詠賢得金牌簡直天淵之別！點解，之唔係「希望愈大、失望愈大」呢個道理囉！
趙詠賢四年前以十九之齡輕鬆殺入決賽，記得小記採訪決賽前夕，特別搵定對手力高嘅資料。當小記睇見力高當年只係一個十五歲小妹妹時，就諗住「小旋風」嘅金牌一定手到拿來，點知……
四年後今日，同樣有機會去採訪趙詠賢對力高呢場釜山亞運壁球決賽；由於近四年往績，「小旋風」對力高輸多贏少，而且有幾次以直落三局慘敗，所以小記噚日出門口前，根本冇期待有機會採訪香港第二金。
眼見「小旋風」步入賽場時嘅沉默，相對於有個小肚腩嘅力高練習時出奇地輕鬆，小記內心恨不得比賽快些結束，再與趙詠賢拍一張同四年前一樣嘅銀牌照片便算。點知……。所以話，世事無絕對，機會係要自己爭取，趙詠賢呢四年嘅努力，今次終於得到回報，值得香港運動員驕傲。 本報記者