噚日港隊撞啱有幾個出金牌項目，小記都好期待呢一日，而心情亦都跟隨佢哋嘅成績，由喜到哀、再由哀到喜，好似坐過山車咁大起大落。
噚日一早，滿懷希望咁去到單車場，就係想見證黃金寶攞香港第一金；賽前阿寶同教練沈金康都充滿信心，但可惜最後因為俾中亞選手夾擊，只得銅牌；一路以嚟單車隊經常出外集訓，都係冇啖好食、冇覺好瞓，一年冇幾多日留喺屋企，為嘅只係有好成績。賽後單車隊人人都話「輸比賽、贏精神」，但小記都好戥佢哋唔抵。
到晏晝，剛剛做完乒乓球比賽，忽然落大雨，心情就好似天氣一樣，跌到谷底。
之後到咗桌球場，見到許晉奎、霍震霆等人為港隊打氣，心情就開心番；到關鍵一場傅家俊對龐衞國，比賽完嘅陳國明同馮國威喺場邊打氣，連隨和嘅教練陳楚君，都第一次叫小記唔好影相，怕有雜聲影響傅家俊，就知佢哋幾緊張。
最後成功奪得金牌，不但桌球隊同小記鬆一口氣，連霍生都有番笑容，畢竟霍生因問題女乒乓球員事件，已經「揦口揦面」咗幾日囉。