大會一向都有安排穿梭巴士畀記者，方便來往比賽場地同新聞中心，可惜噚日單車公路賽，大會只安排一架巴士，小記訪問完阿寶後，巴士已經爆滿，好彩最後得到港隊教練沈金康的義助，車咗小記到附近嘅的士站。大會真係要諗吓安排多啲巴士先得嘞。
大會贊助商對記者行家都算唔錯，喺新聞中心擺滿餅乾、糖果等，重不時補充，免費畀行家醫肚，而某健康飲品喺新聞中心，就只係象徵式賣一千韓圜（唔夠港元一毫子）一罐，行家「搏殺」時都唔怕餓親。
噚日除咗阿寶同桌球隊攞牌外，港隊重有一個成員攞獎，佢就係隊醫張維。亞奧理事會頒咗個醫學及運動科學獎畀佢，表揚佢喺多屆亞運為大會出力，港隊秘書長彭沖亦大讚張醫生多年來為港隊盡心盡力。
噚日滑浪風帆正式展開，亦係記者開始食暈浪丸嘅日子；其實大會安排嘅採訪船唔算細，差唔多等於香港嘅水警輪咁大，足夠十多位行家一齊上船影相；但釜山海面實在太大浪，採訪船左搖右擺，好多冇食定暈浪丸嘅行家都嘔到死死吓。