恒指最低8915，距離去年911後最低嘅8894，相差21點，最後跌125點，收8984。是否代表見雙底，搵到支持？兩睇也。以港市而言，低位有護盤行動，八千九有機會頂得住。奈何美國嗰便成日唔妥，每次向上彈完之後，好快又向下跳。另外，港市耐唔中有啲股票忽然有人大掟，成個清倉格，就算冇乜消息，都照掟，例如隻「8號仔」電盈，得番1.04元，散7仙，見新低。
有乜依郁，恒指8894守唔住嘅話，下便有幾百點水位。做淡友，最直接途徑係揸啲恒指Put輪，兩件對象係9444同9452。兩隻輪槓桿率唔算勁，所以波幅冇1啲藍籌Put輪咁大。
咪死牛一便頸，大市跌得急嘅話，話唔埋有挾淡倉活動，記得平淡倉，又或者調轉槍頭，揸番啲恒指Call輪，對象係9406同9552。無論做淡做好，都要計住荷包，咪賭輸唔起嘅注碼。
跌市中，國泰（293）有10仙進帳，其他兩大國內航空股都跌。國泰逆市升，好難維持，真係會飛咩？做世界揀隻國泰Put輪埋手，即係9117，有個半月命仔，現價20.4仙，溢價0.8%，槓桿率5.3倍，目標係搵兩分錢利潤。不過記住隻輪將近末日，宜炒不宜揸。
章 盛